Izraıl bıligi Golboa jotasyndaǵy túrmeden qashqan alty tutqyndy izdestirip jatyr. Bul týraly Ortalyq Azııa jańalyqtar qyzmeti habarlady, dep jazady Egemen.kz.
Tutqyndar birneshe aı boıy ózderi otyrǵan kameradan qasyqpen jer asty jolyn qazǵan.
Qashqyndardyń arasynda birneshe Izraıl azamattaryn óltirdi dep aıyptalǵan Zaharııa Zbeıdı bar. Ol «Ál-Aksa brıgadasynyń» lıderi. Qalǵan beseýi – «Islam jıhady» qozǵalysynyń músheleri. Bári ómir boıy túrme jazasyna kesilgen.
«Shın Bet» qaýipsizdik qyzmeti olar túrmege zańsyz kirgizilgen mobıldi telefonmen syrttaǵy adamdarmen baılanysta bolǵan dep esepteıdi. Týnel syrtynda olardy kólik kútip turǵan dep boljaıdy.
Qazir Izraılde tutqyndardy ustaý operasııasy júrip jatyr. Bılik olar Iordanııaǵa ótip ketýi múmkin dep qaýiptenedi. Sebebi, qazylǵan týnel men Iordanııanyń arasy 14 shaqyrym.