QR Premer-Mınıstri Asqar Mamın RF Úkimeti Tóraǵasynyń orynbasary Marat Hýsnýllınmen kezdesý ótkizdi, dep habarlaıdy Egemen.kz Premer-Mınıstrdiń baspasóz qyzmetine silteme jasap.
Taraptar saýda-ekonomıka, ónerkásiptik kooperasııa, tranzıttik-kólik, qurylys salalaryndaǵy yntymaqtastyqty odan ári damytý, sondaı-aq QR men RF aımaqaralyq yntymaqtastyǵynyń XVII forýmy aıasynda qol jetkizilgen joǵary deńgeıdegi ýaǵdalastyqtardy iske asyrý máselelerin talqylady.
Kelissóz barysynda kólik ınfraqurylymynyń ozyq damýy, eki eldiń tranzıttik áleýetin kúsheıtý jáne «Batys Eýropa – Batys Qytaı», «Soltústik – Ońtústik» dálizderi jáne EAEO keńistigindegi basqa baǵyttar aıasyndaǵy aımaqtyq kóliktik ózara baılanys máselelerine erekshe nazar aýdaryldy.
QR Premer-Mınıstri ınfraqurylymdy damytý jumystaryn úılestirý, sondaı-aq Qazaqstan-Reseı shekarasy arqyly ótkizý pýnktterin rekonstrýksııalaý arqyly kólik áleýetiniń tıimdiligin arttyrý qajet ekenin atap ótti.
Reseı Qazaqstannyń negizgi saýda-ekonomıkalyq seriktesi. Bıyl elder arasyndaǵy saýda-ekonomıkalyq yntymaqtastyq serpini birtindep qalpyna keltirilip jatyr. Osy jylǵy qańtar-shilde aılarynda ekijaqty taýar aınalymy $12,7 mlrd qurady, bul 2020 jylǵy sáıkes kezeńiniń kórsetkishinen 26,7%-ǵa joǵary. Qazirgi dınamıka saqtalǵan jaǵdaıda, eki el arasyndaǵy saýda kólemi bıyl $20 mlrd-tan asýy múmkin.