Qazaqstannyń alty azamaty ańyzǵa aınalǵan, álemdegi eń kóne, eń bedeldi marafondardyń biri sanalatyn Boston marafonynda júgirdi, dep habarlaıdy Egemen.kz.
125-shi Boston marafony 11 qazanda ótti. Oǵan 20 myńǵa jýyq adam qatysty.
42 shaqyrym 195 metr qashyqtyqty baǵyndyrǵan qazaqstandyqtar arasynda «Almaty marafonynyń» dırektory Saltanat Qazybaeva, Qazaqstannyń AQSh-taǵy vıse-konsýly Erlan О́tegenov, Asqar Eserkenov, Álııa Aıtqazına, Danııar О́teýlın men Baǵdat Ahmetov bar.
Boston marafonyna sertıfıkattalǵan marafondardan irikteýden ótý arqyly (ár jas sanaty boıynsha irikteý ýaqyty bar) nemese qaıyrymdylyq arqyly (qaıyrymdylyq 7-9 myń dollardan bastalady) qatysýǵa bolady.
Boston marafony dástúrli túrde sáýir aıynyń úshinshi dúısenbisinde memlekettik mereke - Patrıottar kúninde ótedi. 2020 jyly pandemııaǵa baılanysty toqtatylyp, bıyl qazan aıyna aýystyryldy.