Bul týraly Egemen.kz Almaty ákiminiń baspasóz qyzmetine silteme jasap habarlaıdy.
Memlekettik qyzmet isteri departamentindegi Ádep jónindegi keńes Almaty qalalyq Qoǵamdyq densaýlyq saqtaý basqarmasy basshysynyń orynbasary Laýra Myrzaǵalıdi qyzmetinen bosatý týraly sheshim qabyldaǵan.
«Memlekettik qyzmet isteri departamentindegi Ádep jónindegi keńes músheleri joǵary laýazymdy tulǵany qyzmetinen bosatý týraly sheshim qabyldap, basqarmaǵa usynys jasady. Densaýlyq saqtaý basqarmasynyń basshysy sheshimdi 10 jumys kúni ishinde (20 mamyrǵa deıin) qabyldaýy kerek», dedi Almaty ákiminiń baspasóz qyzmetinen.
Eske salaıyq, buǵan deıin qyzmetkerimen syıaqy týraly sóz talastyrǵan Almaty qalalyq qoǵamdyq densaýlyq saqtaý basqarmasy basshysynyń orynbasary túsirilgen vıdeo áleýmettik jelide taraǵan edi. Internet qoldanýshylary atalǵan oqıǵany qyzý talqylady.