Qorǵanys mınıstri S.Ahmetov Petropavlda ornalasqan qorǵanys-ónerkásip keshenderi kásiporyndaryn aralady, dep habarlady osy vedomstvonyń baspasóz qyzmeti.
S.Ahmetov Petropavl aýyr mashına jasaý zaýytyna, S.M.Kırov atyndaǵy zaýytqa jáne «Munaımash» zaýytyna baryp, kásiporyndardyń óndiristik-tehnologııalyq múmkindikterimen, shyǵarylatyn ónimdermen tanysty.
Mınıstrge zaýyt ókilderi óz ónimderin aldaǵy 22-25 mamyrda Astanada ótetin úshinshi halyqaralyq «KADEX-2014» qarý-jaraq jáne áskerı-tehnıkalyq múlik kórmesine usynýǵa daıyn ekendikterin jetkizdi.
S.Ahmetov elimiz Qarýly Kúshterin odan ári jetildirý jáne qaıta qarýlandyrýda, armııanyń jaýyngerlik ázirligi men jaýyngerlik qabileti máselelerin sheshýde qorǵanys-ónerkásip keshenderin nyǵaıtýdyń mańyzdylyǵyn atap ótti.