ATYRAÝ. 19 mamyr. Atyraý oblysy sportynyń jas óreni Evgenıı Polıvadov grek-rım kúresinen kadetter arasynda Azııa chempıony atandy. Bul týraly egemen.kz tilshisi habarlady.
О́tken aptada Bangkokta grek-rım kúresinen kadetter arasyndaǵy Azııa chempıonaty aıaqtaldy. Osynaý qurlyqtyq saıysta Qazaqstan quramasynyń balýandary eki altyn, eki kúmis jáne tórt qola medal utyp aldy. Qos altyn medaldiń birin enshilegen atyraýlyq balýan Evgenıı Polıvadov 69 kıloda tórt qarsylasynan da basym túsip, Azııa chempıony atandy. Sóıtip, bolashaǵynan úmit kúttirgen jas balýan E.Polıvadov Qytaıda ótetin kadetterdiń Olımpıadalyq oıyndaryna beriletin joldamany utyp aldy. Kadetterdiń Olımpıadalyq oıyndary tamyz aıynda ótedi.
Eske sala keteıik, atyraýlyq balýan buǵan deıin Qazaqstan chempıonatynda jeńistiń bıik tuǵyryna kóterilgen edi. Sonymen qatar, Olımpıada oıyndarynyń júldegeri, dańqty balýan Dáýlet Turlyhanov atyndaǵy halyqaralyq týrnırde de jeńimpaz atanyp úlgerdi. Aıtqandaı, Evgenıı Polıvadovty óziniń ákesi Aleksandr Polıvadov jattyqtyrady. A.Polıvadov Azııa chempıonatynyń júldegeri Meırambek Turdalıev, Qazaqstan chempıondary Nurlan Muqanov, Talǵat Qazıev jáne Farhad Ǵımranovtaı sheberlerdi shyńdaǵan belgili bapker.
Joldasbek Shópeǵul.
Derekkóz: egemen.kz.
Foto: egemen.kz.