Qazaqstandaǵy aýyl turǵyndarynyń ómir súrý uzaqtyǵy qala turǵyndaryna qaraǵanda turaqty túrde joǵary. Bul týraly Densaýlyq saqtaý mınıstri Ajar Ǵınııat aıtty, dep habarlaıdy Egemen.kz.
Mınıstr búginde aýylda 7,8 mıllıon adam turatynyn, bul el halqynyń 41 paıyzyn quraıtynyn atap ótti. Statıstıkaǵa súıensek, aýyl turǵyndarynyń 38 paıyzy balalar, 62 paıyzy eresekter.
«Halyqtyń densaýlyq kórsetkishterin taldaý aýyl turǵyndarynyń ómir súrý uzaqtyǵy qala turǵyndaryna qaraǵanda turaqty joǵary ekenin kórsetedi», dedi Densaýlyq saqtaý mınıstrliginiń basshysy Májilistegi Úkimet saǵatynda.
Densaýlyq saqtaý mınıstrliginiń málimetinshe, ótken jylmen salystyrǵanda bıyl jalpy ólim kórsetkishi 14 paıyzǵa tómendegen.
«Elde aýyldyq medısınalyq uıymdardyń ınfraqurylymy damyǵan. Bes myńnan astam medısınalyq uıym aýyl turǵyndaryna medısınalyq kómek kórsetedi. Onyń ishinde eki myńnan astam medısınalyq pýnkt, 800 feldsherlik-akýsherlik pýnkt, 1 myńnan astam dárigerlik ambýlatorııa, 200-den astam emhana jáne 203 aýrýhana bar», dep qosty Ajar Ǵınııat.