Fýtzaldan Qazaqstan ulttyq quramasy 2024 jyly ótetin álem chempıonatynyń negizgi irikteý kezeńindegi ekinshi oıynynda da jeńiske jetti. Besinshi topta óner kórsetip jatqan jerlesterimiz syrt alańda Chernogorııa quramasyn iri eseppen tize búktirdi.
Irikteý kezeńniń alǵashqy týr oıynyn elordada ótkizip, Slovenııa quramasyn senimdi túrde jeńgen (2:0) Rıkardo Kaka jattyqtyratyn ulttyq qurama jigitteri Chernogorııada aralas qurammen oınasa da, jankúıerlerdi jerge qaratqan joq. Syrt alańdaǵy matchqa jaraqattaryna baılanysty negizgi quramnyń bir emes, tórt birdeı oıynshysy qatysa almady. Atap aıtar bolsaq, bıyl Nıderlandta ótken Eýropa chempıonatynyń úzdik surmergeni Birjan Orazov (7 gol), Slovenııamen bolǵan oıynda gol soqqan Dýglas jáne sol matchta parketke shyqqan tájirıbeli fýtzalshylarymyz Shyńǵys Esenamanov pen 2021 jylǵy Qazaqstannyń úzdik oıynshysy Dáýren Tursaǵulov ulttyq quramaǵa kómektese almady.
Esesine, bul matchta birqatar qazaqstandyq jas fýtbolshylar ózderin kórsetýge múmkindik aldy. Ádette mańyzdy oıyndarda jastardy alańǵa shyǵara bermeıtin Rıkardo Kaka Podgorısadaǵy kezdesýde qosalqy qaqpashy Nurálem Baıdýlladan basqa barlyq oıynshyny parketke shyǵardy. Onysy túsinikti. Sebebi Kaka Dýglas, Taınan sekildi jasy kelip qalǵan quramadaǵy ardager fýtzalshylardyń ornyn basady-aý degen izbasarlardyń qarym-qabiletin qazirden-aq tekserip jatyr. О́ıtkeni aldaǵy eki-úsh jylda Qazaqstan quramasyn býyn almasý prosesi júretini belgili. Dýglastar qashanǵa deıin dop tebe beredi deısiz?!
Bálkim, eki jyldan keıin jalaýy jelbireıtin álemdik dodada negizgi quramnan keshe parketke shyqqan Raıymbek Juma, Aqjol Dáribaı, Serik Májıtov sekildi jas órenderimizdi kórip qalarmyz. Degenmen, jas jigitter Chernogorııaǵa qarsy oıynda gol soǵa almasa da, jaman oıyn kórsetti dep aıta almaımyz. Bastysy – qatelik jasamaı, jattyqtyrýshynyń tapsyrmasyn tolyq oryndap shyqty.
Qazaqstan men Chernogorııa fýtzalshylary buǵan deıin birde-bir ret ózara oıyn ótkizbegen soń, eki qurama da alǵashqy taımda «syryn bilmeıtin attyń syrtynan júrme» degendeı, óte saqtyqpen oınady. Kezdesýdiń 11-mınýtynda Leo esep ashyp, Qazaqstan quramasyn alǵa shyǵarǵannan keıin ǵana oıyn jandana bastady. Kóbine qarsy shabýylǵa ıek artqan alań ıeleri arada alty mınýt ótkende tarazy basyn teńestirdi. Gol avtory – Fılıp Markovıch. Birinshi kezeńniń aıaqtalýyna bir mınýt qalǵanda Edson dáldik tanytyp, tablodaǵy kórsetkishti 1:2-ge jetkizdi. Bir qyzyǵy, alǵashqy taımdaǵy úsh goldyń úsheýi de oıyn jaǵdaıynda emes, standarttan soǵyldy.
Úzilis ýaqytynda Kakadan kerekti aqyl-keńesti tyńdap shyqqan jerlesterimizdiń ekinshi taımdaǵy oıyny túrlenip shyǵa keldi. Birinshi taımda gol soǵatyn birneshe múmkindigin paıdalana almaǵan Albert Aqbalyqov, Taınan ekinshi 20 mınýtta óz enshilerine bir-bir goldan jazdy. Sondaı-aq Arnold Knaýb ta bir márte mergendigimen kózge tústi. Qorytyndy esep – 1:5.
Qatarynan eki matchta iri eseppen jeńilgen Chernogorııa (olar alǵashqy týrda Slovenııadan 3:1 esebimen utylǵan) irikteý kezeńniń kelesi satysyna shyǵýdan túbegeıli úmitin úzdi. Sebebi Elıtaly raýndqa tek top kóshbasshysy ǵana shyǵady. Alǵashqy eki týrda upaıdan shashaý shyǵarmaǵan Qazaqstan quramasy 6 upaımen birinshi orynǵa myqtap jaıǵasyp aldy. Ekinshi oryndaǵy Slovenııada áli úmit bar. Olardyń enshisinde úsh upaı bar.
Endi Qazaqstan quramasy kelesi týr oıynyn 9 qarashada Almatyda dál osy Chernogorııamen ótkizedi. Eger jerlesterimiz bul oıynda da jeńiske jetip, sońǵy týrda Slovenııamen teń tússe de irikteýdiń elıtaly kezeńine joldama alady. Sońǵy týr matchy 2023 jyldyń 8 naýryzyna josparlanǵan.