Kelesi aptada Alataý baýraıyndaǵy ásem shaharda mánerlep syrǵanaý sportynyń «muzbalaǵy», 2014 jylǵy Sochı Olımpıadasynyń qola júldegeri Denıs Tendi eske túsirýge arnalǵan III halyqaralyq týrnırdiń jalaýy jelbireıdi. Halyqaralyq konkı tebýshiler odaǵy (ISU) uıymdastyratyn Challenger sanatyndaǵy jarys 26-28 qazan kúnderi Almatydaǵy «Halyq Arena» sport kesheninde ótedi.
Qazaqtyń dańqty mánerlep syrǵanaýshysy Denıs Tendi eske alýǵa arnalǵan týrnır az ýaqyttyń ishinde dástúrli jarystyń birine aınalyp úlgerdi. Dúnıe júziniń sportshylary bas qosatyn halyqaralyq týrnırdiń tusaýy eń alǵash 2019 jyly Almatyda kesilgen bolatyn. Degenmen, 2021 jylǵy jarys ońtústik astanadan elordaǵa kóshirildi. Sóıtip bas qalada ótken baıraqty básekede álemniń 18 elinen kelgen sportshylar sheberlik baıqasty. Olardyń qatarynda Reseı birinshiliginiń qola júldegeri Mark Kondratıýk, 2020 jylǵy jasóspirimder Olımpıadasynyń kúmis júldegeri, jastar arasyndaǵy álem chempıony Andreı Mozalev, jastar arasyndaǵy álem chempıonatynyń qola júldegeri Petr Gýmmenık, jastar arasyndaǵy gran-prı jarystarynyń jeńimpazy men júldegerleri Anastasııa Mýhortova, Dmıtrıı Evgenev jáne taǵy basqa mánerlep syrǵanaýshylar bar.
Bıyl ISU Challenger-diń 7-kezeńi sanalatyn «Denıs Ten memorıaly» Mádenıet jáne sport mınıstrligine qarasty Sportty damytý dıreksııasy men Almaty qalasy ákimdiginiń qoldaýymen «Halyq Arena» sport kesheninde ótedi. Qazirdiń ózinde atalǵan jarysqa Japonııa, Koreıa, Italııa, Fransııa, Germanııa, Izraıl, Bolgarııa, Majarstan, Ázerbaıjan, Moldova, Armenııa, Grýzııa, Ýkraına jáne Qyrǵyzstan Ulttyq federasııalary sportshy jiberetinderin rastady. Al qazaqstandyq mánerlep syrǵanaýshylar barlyq baǵdarlamada óner kórsetedi.
Bıylǵy memorıaldyń basty qoıylymy – japonııalyq Kana Mýramoto men Daısýke Takahası jubynyń bıi bolmaq. Denıstiń dosy bolǵan Daısýke Takahası – jekeleı synda sátti óner kórsetken sportshy, 2010 jyly Vankýverdegi Olımpıadanyń júldegeri atanǵan.
Sondaı-aq bıylǵy jarysqa arnaıy shaqyrylǵan qonaqtar qatarynda halyqaralyq dárejedegi sport sheberi Marına Zýeva, Olımpıada chempıondary Gordeeva-Grınkov pen Vertıý-Skott, Olımpıada jeńimpazy kanadalyq Patrık Chan jáne t.b. bar. Týrnır jeńimpazdaryn marapattaý rásiminen keıin sportshylardyń qatysýymen Gala-shoý ótedi.
Aıta keteıik, ISU Challenger Series týrnırleri 2014 jyldan bastap qyrkúıekten jeltoqsanǵa deıin ótedi. ISU Chellendjer serııasyna engizilgen jarystardyń tizimin jyl saıyn qaıta bekitip otyrady.
Denıs Ten de kezinde ISU Challenger serııasynda eki ret jeńiske jetken. Otandasymyz 2014 jyly jattyǵýlardyń tyǵyz kestesi men josparlanǵan ózge jarystarǵa qaramastan, osy serııaǵa da qatysýǵa sheshim qabyldaǵan bolatyn. Horvatııadaǵy Zlatna pirueta Zagreba týrnırinde keremet óner kórsetip, 1-oryndy jeńip aldy. 2015 jyly da Denıs Zagrebtegi dodada taǵy da úzdik shyqqan edi.