Keshe Ammanda ótip jatqan bokstan erler men áıelder arasyndaǵy Azııa chempıonatynyń jartylaı fınalyna shyqqan boksshylardyń esimi belgili boldy. Jeksenbi kúngi básekelerdiń qorytyndysy boıynsha, Qazaqstan quramasynyń 14 boksshysy sol mejeden kórindi. Sondaı-aq dúısenbi kúni taǵy jeti bylǵary qolǵap sheberimiz shırek fınal kezdesýlerin ótkizdi.
Altynshy jarys kúniniń kúndizgi sessııasynda Qazaqstan boksshylarynan birinshi bolyp 54 kılo salmaq dárejesindegi otandasymyz Mahmud Sabyrhan sharshy alańǵa kóterildi. Byltyrǵy álem chempıonatyndaǵy tabysty ónerinen keıin jankúıerlerdiń kózaıymyna aınalǵan Mahmud Sary qurlyq birinshiligindegi alǵashqy aıqasyn mońǵolııalyq Dornyambýý Ganboldpen ótkizip, 5:0 esebimen jeńiske jetti. Bir jekpe-jek arqyly jartylaı fınalǵa shyqqan ol kem degende qurlyq básekesiniń qola júldesin ıelenedi. Degenmen altynnan úmitti boksshymyz fınalǵa shyǵý úshin 10 qarashada ózbekstandyq Shahzod Mýzafarovpen kezdesedi.
Sabyrhannyń izin ala rıngke 57 kılo salmaqtaǵy Serik Temirjanov shyǵyp, ol da jartylaı fınalǵa joldama aldy. Jergilikti boksshy Iýsef Iashashpen qolǵap túıistirgen otandasymyz tóreshilerdiń biraýyz sheshimimen basym tústi. Endi jartylaı fınalda ol úndistandyq boksshymen kezdesedi.
Sondaı-aq 60 kılodaǵy Samatáli Tóltaev ta Azııa birinshiligindegi alǵashqy jekpe-jegin sátti ótkizip, qyrǵyzstandyq Mırzohıd Imamnazarovtan tóreshilerdiń aralas sheshimimen aılasyn asyrdy. Jastar arasyndaǵy Azııa chempıony Samatáli fınal joldamasyn jergilikti boksshymen sarapqa salady.
Keshki sessııada baq synaǵan jeńil salmaqtaǵy Sanjar Táshkenbaı shırek fınalda qyrǵyzstandyq Mırlan Týrkbaıulyn tize búktirdi. 1/8 fınalda ózbek boksshysyn jarys jolynan yǵystyrǵan Sanjarǵa qyrǵyz boksshysy da qarsylyq kórsete alǵan joq. Otandasymyz endi jartylaı fınalda úndistandyq bylǵary qolǵap sheberimen judyryqtasady.
Erler arasynda sońǵy bolyp sharshy alańǵa el chempıony Dýlat Bekbaýov (67 kılo) shyqty. Alǵashqy aıqasyn sátti ótkizgen otandasymyz shırek fınalda taǵy bir qyrǵyzstandyq Jakshylyk Talaıbekovten aılasyn asyrdy. Dýlat fınalǵa shyǵý úshin birneshe halyqaralyq týrnırdiń jeńimpazy ózbekstandyq Asadhodja Mýıdınhodjaevpen jekpe-jek ótkizedi.
Jeksenbi kúngi jarys kúninde baq synaǵan qyzdarymyzdan tek Alýa Balqybekova (48 kılo) ǵana jartylaı fınalǵa joldama aldy. Byltyrǵy Azııa chempıonatynda top jarǵan otandasymyz shırek fınalda Taıland ókili Thıpsatcheı Iodvarıdi tóreshilerdiń biraýyz sheshimimen qapy qaldyrdy.
О́kinishke qaraı, byltyrǵy boksshylar dodasynda altynnan alqa taqqan 60 kılodaǵy Rımma Volosenko shırek fınalda mońǵolııalyq qarsylasyn eki ret nokdaýnǵa túsirse de, tóreshiler mońǵol qyzy Nomın-Erdene Týgsjargaldyń qolyn kóterdi. Sóıtip, Volosenko byltyrǵy Azııa chempıony ataǵyn saqtaı almady.
Osylaısha, shırek fınal jekpe-jekterinen keıin 14 boksshymyz jartylaı fınalǵa joldama jeńip aldy. Atap aıtqanda, Sanjar Táshkenbaı (48 kılo), Sáken Bıbosynov (51 kılo), Mahmud Sabyrhan (54 kılo), Serik Temirjanov (57 kılo), Samatáli Tóltaev (60 kılo), Dýlat Bekbaýov (67 kılo), Alýa Balqybekova (48 kılo), Jazıra Oraqbaeva (52 kılo), Jaına Shekerbekova (54 kılo), Karına Ibragımova (57 kılo), Mádına Nurshaeva (66 kılo), Darıǵa Shákimova (70 kılo), Gúlsaıa Erjan (81 kılo) jáne Lázzat Kúngeıbaeva (+78 kılo) jartylaı fınalda aıqasatyn boldy.
Sondaı-aq keshe Aslanbek Shymbergenov (71 kılo) úndistandyq Sachınmen, Nurqanat Raıys (75 kılo) qyrǵyzstandyq Sagyn Satybaldyulymen, Nurbek Oralbaı (80 kılo) taılandtyq Vırapon Chondjohomen, Saǵyndyq Toǵambaı (86 kılo) tájikstandyq Navrýz Djafoevpen, Aıbek Oralbaı (92 kılo) úndistandyq Navın Kýmarmen, Qamshybek Qońqabaev koreıalyq Do Hen Kımmen jáne Nazym Qyzaıbaı (50 kılo) mońǵolııalyq Balsan Mýngýnsaranmen kúsh synasty.