Rıdderdegi jylý elektr ortalyǵynda oryn alǵan apattan keıin qala turǵyndarynyń úılerine jylý berile bastady, dep habarlaıdy Egemen.kz.
5 qarashada Rıdderdegi jergilikti jylý elektr ortalyǵynda taǵy bir apat bolyp, 22 myń abonent jylýsyz qalǵan edi. ARtynsha jedel shtab qurylyp, qalada tótenshe jaǵdaı jarııalandy.
Rıdderlikter el Prezıdentiniń atyna jaǵdaıdy baqylaýǵa alýdy surap, ótinish te jazdy. Keıin Shyǵys Qazaqstan oblysynyń ákimi Danıal Ahmetov Rıdder qalasynyń jylý elektr ortalyǵyn kommýnaldyq menshikke berý máselesi qarastyrylyp jatqanyn aıtty.
Resmı aqparatqa sáıkes, qazir Rıdderdegi jylý elektr ortalyǵyndaǵy apatty joıýǵa Shyǵys Qazaqstannyń túkpir-túkpirinen iri óndiristik jáne kommýnaldyq kásiporyndardyń ókilderi qatysýda. Jumys táýlik boıy júrgizilýde.
«Rıdder JEO-da oryn alǵan tótenshe jaǵdaıdy joıý boıynsha jumys júrgizilip jatqanyna búgin tórtinshi kún. Qazirdiń ózinde eki qazandyq iske qosyldy, taǵy bireýi jylý bere bastady. Júıedegi temperatýra 57 gradýsqa deıin kóterildi», dep jazdy ShQO ákimi Danıal Ahmetov Instagram jelisindegi paraqshasynda.
Onyń aıtýynsha, qazirgi ýaqytta №4 qazandyqty jóndeý jumystary júrgizilýde.
Aıta keteıik, sońǵy kúnderi Rıdderde qar jaýdy. Aýa temperatýrasy kúndiz nólden aspaǵanymen, túnde mınýs 11 gradýsqa deıin tómendeıdi.