Bul kúnderi Koreıanyń bas shahary – Seýl men Inchon qalasynda gandboldan XIX Azııa chempıonaty ótip jatyr. Sary qurlyq dodasyna qatysyp jatqan Qazaqstannyń áıelder quramasy jarystyń kezekti kúninde Taılandty tize búktirdi.
Azııa birinshiliginiń «V» tobynda baq synap jatqan jerlesterimizdiń bul – chempıonattaǵy ekinshi jeńisi. Buǵan deıin qazaqstandyq gandbolshylar ekinshi týrda Gonkong quramasynan basym túsken bolsa, alǵashqy týrda Qytaı sportshylaryna ese jibergen edi. Bul joly Taılandtan aılasyn asyrdy – 30:24. Eki jeńisten keıin Qazaqstan quramasy óz tobynda úshinshi orynda tur. Qyzdarymyz sońǵy týrda (30 qarashada) Japonııamen kezdesedi.
Qurlyq dodasy 4 jeltoqsanda máresine jetedi. Bıylǵy Sary qurlyq dodasynda úzdik shyqqan 5 qurama 2023 jylǵy 30 qarasha men 17 jeltoqsan aralyǵynda Danııa, Norvegııa jáne Shvesııada ótetin XXVI álem chempıonatyna joldama alady.