Bas prokýratýra Sybaılas jemqorlyqqa qarsy is-qımyl agenttigimen birlesip, jer qoınaýyn paıdalaný isiniń barlyq satysynda zań buzylatynyn anyqtady, dep habarlaıdy Egemen.kz Úkimet otyrysyna qatysyp jatqan Prezıdenttiń sózine silteme jasap.
«Memlekettik jer qoınaýyn basqarý baǵdarlamasynda burmalanǵan nemese eskirgen málimetter bar. Qory naqtylanǵan jáne ıgerýge daıyn turǵan ken oryndaryna barlaý jumysyn júrgizýge 143 lısenzııa men kelisim-shart zańsyz berilgen. Elimizde qundy paıdaly qazbasy bar ken oryndary az emes. Áleýmettik-kásipkerlik korporasııalar osyndaı ıaǵnı, altyn, mys, myrysh t.b. 87 kenishti zańsyz alǵan», dedi Qasym-Jomart Toqaev.
Olar baıqaý ótkizý rásimderin aınalyp ótip, kenishterdi jeke kompanııalarǵa sý tegin bergen.
«Úkimetke Bas prokýratýramen birlesip, zańsyz berilgen ken oryndaryn memleket menshigine qaıtarý úshin tıisti sharalar qabyldaýdy tapsyramyn. Sosyn bul jerler adal jumys isteıtin ınvestorlarǵa usynylady. Olarǵa tıisti mindettemeler júkteledi. Sońǵy kezde geologııa salasyndaǵy reformalardy sozbalańǵa salýǵa áreket jasalyp jatqanyn kórip otyrmyz. Baıaǵy keńestik júıege qaıta oralyp, jer qoınaýyn «shaǵyn toptyń ǵana ıgiligine» aınaldyrǵysy keletinder bar. Qazaqstannyń jer qoınaýy ınvestorlar úshin ashyq bolýy kerek. Sondyqtan Úkimet bul salada tártip ornatýǵa tıis», dedi Memleket basshysy.