Álıhan Smaıylov búgin Úkimet otyrysynda jaýapty sala ókilderine birqatar tapsyrma júktedi, dep habarlaıdy Egemen.kz.
Álıhan Smaıylov Memleket basshysynyń saılaýaldy baǵdarlamasyn iske asyrý jónindegi is-qımyl josparynyń is-sharalaryn mınıstrlikterdiń salalyq tujyrymdamalary men damý josparlaryna qosýdy tapsyrdy.
Odan bólek, Úkimet basshysy memlekettik basqarý deńgeıleri arasynda fýnksııalardy qaıta bólý arqyly zańnamalyq aktilerdi júıeli tekserýdi aıaqtaý, qazirgi syn-qaterlerdi eskere otyryp, ınflıasııany baqylaý jáne tómendetý jónindegi sharalar keshenin jańartý jáne bir aı merzimde halyqtyń tabysyn arttyrý baǵdarlamasyn ózektendirý qajettigin atap ótti.
Sonymen qatar Premer-Mınıstr «Qarapaıym zattar ekonomıkasy» baǵdarlamasy aıasynda syıaqy mólsherlemelerin sýbsıdııalaý merzimin 7 jylǵa deıin uzartý múmkindigin qarastyrý, tutynýshylyq kredıt berý kólemin qysqartý sharalaryn ázirleý jáne Ulttyq qordan transfertterdi birtindep tómendetýdi qamtamasyz etý kerektigin aıtty.
Oǵan qosa, bıýdjetteý tásilderin odan ári jetildirý, ortalyq jáne jergilikti atqarýshy organdardyń birinshi basshylaryna kóbirek derbestik berý, sondaı-aq Ekonomıkany demopolızasııalaý jónindegi vedomstvoaralyq komıssııanyń jumysyn kúsheıtý boıynsha jumys júrgizilýi tıis.
Álıhan Smaıylov zań buzýshylyqpen berilgen ken oryndaryn memleket menshigine qaıtarý jóninde sharalar qabyldaý, káriz-tazartý qurylystaryn salý jáne jańǵyrtý jónindegi jobalardy iske asyrýdy jedeldetý, respýblıkadaǵy árbir JEO-nyń jaı-kúıin keshendi qaraý jáne Almatyda JEO-2 jáne JEO-3 úshin qajetti gaz ınfraqurylymyn júrgizý jónindegi jumysty jandandyrý qajettigine nazar aýdardy.
Sonymen qatar Premer-Mınıstr aýyl sharýashylyǵy mınıstrligine memleket menshigine qaıtarylǵan aýyl sharýashylyǵy jerleriniń ashyq sıfrlyq kartasyn jasaýdy tapsyrdy. Olardy bólý tetigi aıqyn bolýy kerek. Al óńirlerdiń ákimderine olardy sheshýdiń naqty algorıtmderin ázirleı otyryp, turǵyndar tarapynan týyndaıtyn problemalyq máselelerge ýaqytyly monıtorıng júrgizýdi qamtamasyz etý tapsyryldy.