Túrkistan oblysynda joǵalǵan qarııanyń máıiti egistikten tabyldy, dep habarlaıdy Egemen.kz Polisia.kz-ke silteme jasap.
Aıta ketsek, buǵan deıin Qyzyltý aýylynyń turǵyny, 1946 jyly týǵan Moldabek Igenbaev 5 qańtarda úıinen belgisiz baǵytqa shyǵyp ketip, qaıta oralmaǵany týraly habarlanǵan. Aryz polısııa bólimine 6 qańtarda tirkelip, qarııanyń júrgen jerin anyqtaýǵa baǵyttalǵan barlyq qajetti izdestirý sharalary júrgizildi. Izdeýge polıseıler men eriktiler, atty aýyl turǵyndary atsalysty. Izdeýge jumyldyrylǵan tártip saqshylary árbir úı, dúken, adamdar kóp shoǵyrlanatyn aımaqtarda joǵalǵan egde jastaǵy qarııanyń sýretin kórsetý arqyly surastyrý jumystaryn atqardy. Sonymen qatar qaraýsyz qalǵan ǵımarattar, oqıǵa ornyna jaqyn aýmaqtaǵy taý-tas, oı-qyr, egistik alqaptary túgel qaralyp, jiti tekserildi.
Habarsyz ketken turǵyndy aman-esen tabý maqsatynda polıseılermen birge aýyl turǵyndary jáne eriktiler de úzdiksiz, kúni-túni izdeý jumystaryn júrgizdi. Qoldanylǵan sharalarǵa qaramastan, ókinishke qaraı, joǵalǵan er adamnyń máıiti 8 qańtarda saǵat 17:00 shamasynda «Shúren tóbe» egistik alqabynan tabyldy. Iаǵnı, egistik alqapta saqshylarmen birge júrgen eki aýyl turǵyny birinshi bolyp máıitti baıqaǵan. Er adamnyń denesin syrttaı qaraý barysynda eshqandaı zorlyq-zombylyq belgileri anyqtalmady. Qazirgi ýaqytta sot-medısınalyq saraptamasy taǵaıyndaldy. Tergeý amaldary júrgizilip jatyr.