Jetisý oblysynyń polıseıleri 70 keliden astam balyq aýlaǵan 48 jastaǵy turǵyndy ustady, dep habarlaıdy Egemen.kz.
Jetisý oblysynyń polıseıleri tabıǵat qorǵaý zańnamasyn buzýshylyqtardy anyqtaý boıynsha is-qımyldardy kúsheıtti. Sońǵy on kún ishinde Jetisý óńirinde jergilikti sý qoımalarynan zańsyz balyq aýlaý jáne tyıym salynǵan daratalshyq torlaryn paıdalanýǵa baılanysty 82 buzýshylyq tirkeldi. Bul jumystar «Brakoner» profılaktıkalyq is-sharasy aıasynda júrgizilip jatyr.
– Oblystyń barlyq aýmaǵyn polıseıler men óńirlik Balqash-Alakól basseındik ınspeksııasy qyzmetkerlerinen turatyn arnaıy toptar aralap júr. 82 zań buzýshylyq anyqtalyp, 280 keliden astam ártúrli balyq túrleri men uzyndyǵy úsh myń metrge jýyq balyq aýlaýǵa tyıym salynǵan aýlar tárkilendi. Sotta bes materıal qaralyp jatyr. Bir qylmystyq is qozǵaldy, – dedi Tabıǵatty qorǵaý polısııasynyń aǵa ınspektory Baǵlan Rymjanov.
Polisia.kz málimetinshe, brakonerliktiń sońǵy faktisi Sarqan aýdanynda tirkelgen. Onda Balqash kólinde Tólebaev aýylynyń 48 jastaǵy turǵyny ustalǵan. 70 keliden astam balyq aýlap úlgergen er adam tyıym salynǵan daratalshyq torlaryn qoldanǵan.
Memleketke keltirilgen zalal shamamen 400 myń teńgeni qurady. Is boıynsha tergeý amaldary QR QK-niń 335-babyna sáıkes júrgiziledi.