Premer-mınıstr Álıhan Smaıylovtyń tóraǵalyǵymen Ortalyq jáne jergilikti memlekettik organdardyń ózara is-qımyly jónindegi úılestirý shtaby sý tasqyny kezeńine qatysty ahýaldy qarady, dep habarlaıdy Egemen.kz.
Tótenshe jaǵdaılar mınıstri Iýrıı Ilın aldyn alý sharalaryna qaramastan, erigen jáne tasqyn sýlar saldarynan Abaı, Aqtóbe, Atyraý, Batys Qazaqstan, Túrkistan jáne Pavlodar oblystarynda 163 turǵyn úı men úsh ǵımaratty sý basqanyn aıtty. Qazirgi ýaqytta Aqtóbe oblysynda 13 úı, Atyraý oblysynda bir turǵyn úı sý astynda qalyp otyr.
Sý basý saldaryn joıý úshin 3,5 myńnan astam adam, 500-den astam tehnıka, 300 júzý jáne 300-ge jýyq sý burý quraldary tartylǵan. Respýblıkalyq jáne oblystyq jedel shtabtar shuǵyl qyzmetter men uıymdardyń qatysýymen sý tasqyny boıynsha ahýaldy baqylaıdy.
Aldyn ala taldaýǵa sáıkes, eldi mekenderdegi turǵyn úılerdi sý basý sebepteri – ózenderdegi sý deńgeıiniń kóterilýi, qorǵanys bógetteriniń qıraýy, azamattardyń jeke ýchaskelerinen qardyń ýaqytyly shyǵarylmaýy jáne jol astyndaǵy sý ótkizý qurylystarynyń ótkizý qabiletiniń tómen bolýy.
Sonymen qatar ındýstrııa jáne ınfraqurylymdyq damý mınıstri Marat Qarabaev baıandama jasady, al óńirlerde qabyldanyp jatqan sharalar týraly Aqtóbe oblysynyń ákimi Eraly Toǵjanov, Aqmola oblysynyń ákimi Ermek Marjyqpaev jáne Soltústik Qazaqstan oblysynyń ákimi Aıdarbek Saparov baıandady.
Premer-mınıstr sý tasqyny problemasyn bekitilgen sý tasqynyna qarsy is-sharalardy jáne tıisti Jol kartasyn iske asyrý, sondaı-aq memlekettik organdar arasyndaǵy tıimdi ózara is-qımyl arqyly keshendi túrde sheshý qajettigin atap ótti.
Qazir elimizdiń soltústik óńirlerinde aýa temperatýrasy joǵarylap keledi, bul qalyń qardy eritip, jańa táýekelderdiń paıda bolýyna ákeledi. Osyǵan baılanysty Álıhan Smaıylov asa qaýipti ýchaskelerdiń mańynda arnaıy tehnıka men ınertti materıaldar qorlaryn shoǵyrlandyryp, ózenderdegi muz jarý jumystaryn jalǵastyrý jáne kólik qatynasy toqtap qalýy múmkin eldi mekenderdi aldyn ala anyqtaý qajettigin atap ótti.
Premer-mınıstr eldi mekenderge qaýip tóngende nemese sý basqan kezde, sondaı-aq qaýipti aımaqtardan kóshirý kezinde ne isteý kerektigi týraly halyqty habardar etý jumystaryn kúsheıtý kerektigin aıtty.
«Halyqpen naqty keri baılanys ornatyp, olardyń kómek berý týraly ótinishterine dereý jaýap berý qajet», dedi Álıhan Smaıylov.
Úkimet basshysynyń aıtýynsha, kelesi sý tasqyny kezeńine daıyndyqty qazirden bastaý kerek: eldi mekenderdiń mańyna bógetter turǵyzyp, sý ótkizý qurylystary men aryqtardy der kezinde tazartý, sondaı-aq sý burý kanaldaryn daıyndaý qajet. Sonymen birge gıdrotehnıkalyq qurylystardyń, bógetterdiń jaǵdaıyn tekserip, qajet bolsa, olardy jóndeý boıynsha sharalar qabyldaý kerek.
«Ákimdikter joldar men kópirlerdiń, elektr jelileriniń qıraǵan ýchaskelerin qalpyna keltirip qana qoımaı, oryn alǵan jaǵdaıǵa taldaý júrgizip, kelesi sý tasqyny kezinde bolýy múmkin qaýip-qaterlerdi eskerýleri qajet. TJM aldaǵy jyldarǵa arnalǵan eldi mekenderdi sý tasqynynan qorǵaý jónindegi is-sharalar keshenin tolyqtyrýy tıis», dedi Álıhan Smaıylov.
Sonymen qatar Premer-mınıstr jylý berý maýsymy máselesine toqtaldy. Úkimet basshysy qysta Ekibastuzda, Rýdnyıda jáne Rıdderde bolǵan jaǵdaıdy eske saldy, onda týyndaǵan máselelerdi sol bette sheshýge týra kelgen edi.
«Sóz joq, ótken qys mezgili jylý energetıkasynda, ásirese, jylý jelileri men jylý stansııalarynda, qazandyqtarda problemalardyń jınaqtalyp qalǵanyn kórsetti. Keıbir óńirlerde kómirdi ýaqytyly jetkizý men qamtamasyz etý boıynsha problemalar da týyndady. Bul – júıeli túrde júretin jyl saıynǵy jumys. Onda eshqandaı irkilister men kemshilikter bolmaýy tıis edi», dedi Álıhan Smaıylov.
Úkimet basshysynyń aıtýynsha, jabdyqtardyń tehnıkalyq jaǵdaıyn turaqty, keshendi jáne obektıvti baǵalaý júrgizilmegen. Osyǵan baılanysty bıyl Úkimet pen jergilikti atqarýshy organdar jabdyqtar men jelilerdi jóndeý boıynsha tıisti jobalardy basym tártippen qarjylandyrýdy qamtamasyz etý kerek.
Álıhan Smaıylovtyń sózinshe, bıyldan bastap energetıkalyq baqylaý jumysy kúsheıtilmek, onyń shtat sany 75 adamǵa ulǵaıtylady, sondaı-aq zań júzinde energııa obektilerine jospardan tys tekserýler júrgizý quqyǵy beriletin bolady.
«Kommýnaldyq menshiktegi jeliler men Jylý elektr ortalyqtaryn jergilikti atqarýshy organdar qarjylandyrýǵa tıis. Al jeke menshiktegi Jylý ortalyqtaryn rekonstrýksııalaýdy menshik ıesiniń qarajaty esebinen júrgizý kerek», dedi Premer-mınıstr.
Jalpy Úkimet basshysynyń pikirinshe, ınjenerlik jelilerdiń jaı-kúıin jáne jóndeý jumystaryn júrgizýdi baqylaýdy kúsheıtý, sondaı-aq energııa obektileri ıeleriniń jaýapkershiligin arttyrý kerek – osylardyń barlyǵy sharttarda jazylýy qajet.