Qazaqstan bochcha federasııasy resmı túrde Boccia International Sports Federation (BISFed) – Halyqaralyq bochcha federasııasynyń múshesi boldy, dep habarlaıdy Egemen.kz.
Bul – zor jetistik. О́ıtkeni atalǵan federasııaǵa múshe bolý erekshe qazaqstandyq sportshylar úshin jańa múmkindikterge jol ashady.
Endi otandyq federasııanyń ókilderi bochcha boıynsha chellendjerler, álem chempıonattary, Paralımpıada oıyndary, Azııa paralımpıada oıyndary sııaqty halyqaralyq jarystarǵa qatysa alady.
Bıyl Qazaqstan bochcha federasııasy Qazaqstan ulttyq quramasynyń 8 múshesine úsh halyqaralyq jarysqa, naqty aıtqanda, eki halyqaralyq chellendjerge jáne Azııa paralımpıada oıyndaryna qatysýǵa ótinim berýdi josparlap otyr. Azııa Paralımpıadasy 2023 jyldyń qazan aıynda Qytaıda, al Paralımpıada 2024 jyly Parıjde ótedi.
«Bul – ınklıýzıvti sport túrleriniń damýyna múddeli kez kelgen adam úshin úlken jeńis. Osylaısha, múgedektigi bar sportshylarǵa jańa múmkindikter týyp otyr. Bizdiń jarystarymyzǵa kóbine erekshe balalar qatysady. Endi olardyń aldynda jańa maqsattar men mindetter paıda boldy. Sondaı-aq jas sportshylar úshin bul ortaǵa beıimdelýge, dos tabýǵa jáne jańa tájirıbe alýǵa zor septigin tıgizedi. Halyqaralyq federasııaǵa múshe bolý bizdiń erekshe sportshylarymyzdyń deńgeıi men eńbeginiń álemdik deńgeıde moıyndalýy ekeni sózsiz», dedi Parlament Senatynyń Tóraǵasy jáne Qazaqstan bochcha federasııasynyń prezıdenti Máýlen Áshimbaev.
Aıta keteıik, bıyl maýsym aıynda Qazaqstan bochcha federasııasy bochchadan Qazaqstan chempıonatyn ótkizedi. Sonyń nátıjesin boıynsha Qazaqstan quramasy jasaqtalady.