Eger sizdiń derbes jáne tólem derekterińiz kıberqylmyskerlerdiń qolyna túsken jaǵdaıda, olar sizdiń onlaın nemese mobıldi bankıngińizdi buzyp, alaıaqtyq tásilmen kredıt resimdeýleri múmkin, dep habarlaıdy Egemen.kz fingramota.kz saıtyna silteme jasap.
Eger siz «basqa adamnyń kredıtiniń» qurbany bolsańyz, onda birinshi kezekte, qaryz resimdelgen kredıttik uıymnyń ataýyn bilip alyńyz, jáne oǵan ótinishpen júginińiz. Atyńyzǵa zańsyz kredıt resimdelý faktisin kredıttik tarıhtyń kómegimen anyqtaýǵa bolady, ony toqsanyna keminde 1 retten kem emes únemi tekserip turý qajet. Derbes kredıttik esepti Memlekettik kredıt bıýrodan, Birinshi kredıttik bıýrodan, HQO-dan nemese egov.kz portaly arqyly alýǵa bolady.
Kredıtordan mindetti túrde ishki qyzmettik retteý júrgizýdi talap etińiz. Sonymen qatar, kredıttik uıym sizge sharttyń kóshirmelerin, oǵan qosymshalardy jáne jeke basty kýálandyratyn qujattardy, sondaı-aq aqsha aýdarylǵan shottyń derektemelerin usynýǵa tıis. Sizge kredıt bergen jáne shartty resimdegen qyzmetkerdiń derekterin naqtylaý qajet.
О́tinishti quqyq qorǵaý organyna da berý qajet. Sizdiń ótinishterińiz tirkelýge tıis, ótinishti qabyldaý kúni kórsetilgen tirkeý nómiri siz ózińizge qaldyratyn ótinishtiń kóshirmesine de qoıylýǵa tıis.
Kredıttik uıym qujattar usynýdan bas tartqan jaǵdaıda, siz QR Qarjy naryǵyn retteý jáne damytý agenttigine shaǵym bere alasyz.
Eger kredıttik uıym aqshany sizdiń jeke kýáligińiz boıynsha alaıaqtardyń alǵanyna dálel taba almasa, turǵylyqty mekenjaıyńyz boıynsha sotqa mámileni jaramsyz dep taný týraly shaǵym-talap berý qajet. Sot sheshimdi sizdiń paıdańyzǵa shyǵarǵan jaǵdaıda, kredıttik uıym:
- sizden boryshty tóleýdi talap etýdi toqtatýǵa;- bereshekti esepten shyǵarýǵa;- kredıttik bıýroǵa sizdiń kredıttik tarıhyńyzdan basqa adamnyń qaryzy boıynsha aqparatty alyp tastaý jóninde hat joldaýǵa tıis.