Ulttyq mýzeıde 1916 jylǵy ult-azattyq kóterilisiniń qaharmany Amangeldi Imanovtyń 150 jyldyǵyna oraı ótip jatqan «Halyq batyry» atty kórmege halyq aqyny Omar Shıpınniń shapany men bórki qoıylǵan. Bul jádigerdi Qostanaı oblystyq tarıhı-ólketaný mýzeıi ákelipti. Atalǵan murajaıǵa ony aıtýly tulǵanyń balalary tapsyrǵan.
Aqynnyń shapany men bórki qanshama jyl ótse de jaqsy saqtalǵan. Keıingi jastarǵa Omar Shıpınniń esimi onsha tanys emes. Biraq onyń táýelsizdikti tý etken týyndylary ádebıetimizden óz ornyn oıyp alǵan.
Aqyn 1916 jylǵy Torǵaıdaǵy ult-azattyq kóteriliske qatysyp, Amangeldiniń jeke hatshysy bolǵan. Osy oqıǵanyń bel ortasynda júrip, birqatar shyǵarmany ómirge ákelgen. Máselen, sol jyldary jazylǵan «Arman», «1916 jyl», «Amangeldiniń aıbaty», «Torǵaı soǵysy» atty tolǵaýlary el arasynda keń taraǵan. Belgili qalamger Sapabek Ásip: «1916 jylǵy ult-azattyq kóterilisiniń poezııalyq panoramasyn alǵash jasaǵan aqyn», dep aıtypty. 1942 jyly «Amangeldi» atty dastany kitap bolyp jaryq kórdi. Sondaı-aq aqynnyń uly aǵartýshy Ybyraı Altynsarın týraly «Ybyraı», Álibı Jangeldın jaıynda «Álıdastan», áıel teńdigin jyrlaǵan «Masaty qyz» jáne «Qoıshy Kúlen», «Jetkinshek», «Sybyzǵy úni» dastandarynda halqymyzdyń basynan ótken aýyr kezeńder aıshyqty sýrettelgen. Olardy synshylar ádebıet qazynasyna qosylǵan súbeli dúnıeler dep baǵalaǵan.