Premer-mınıstrdiń orynbasary Altaı Kólginov Atyraý oblysyna jumys sapary aıasynda Mahambet aýdany Saraıshyq aýylyndaǵy sapar ortalyǵymen tanysty. Bul ortalyq «Saraıshyq» tarıhı-mádenı murajaı-qoryǵynyń aýmaǵynda salynyp jatyr.
Mýzeı-qoryq dırektory, tarıh ǵylymdarynyń doktory Ábilseıit Muhtardyń aıtýynsha, jaqynda sapar ortalyǵyn ashý josparlanǵan. Onyń quramynda ekspozısııalyq kórme zaldary, qor qoımasy, konferens-zal, zerthanalyq jáne restavrasııalyq bólmeler, elektrondy derekter bazasy jasaqtalǵan kitaphana bar. Ortalyqta dáris ótkizýge arnalǵan alańdar, ashyq aspan astyndaǵy mýzeı jáne etnoaýyl da ornalasqan.
– Qazaq dalasyndaǵy eń kóne tarıhı oryndardyń biri, iri saýda qalasy Saraıshyq 1580 jyly qıraǵan. Budan 300 jyl buryn bul Uly Jibek joly ortalyqtarynyń biri bolǵan edi. Sol sebepter, Saraıshyqtyń tarıhy tym tereńde jatyr. О́ıtkeni bul – Uly Jibek joly boıyndaǵy ortaǵasyrlyq qala. Sapar ortalyǵynda mońǵolǵa deıingi, mońǵol kezeńi, sondaı-aq Noǵaı ordasy men Qazaq handyǵy tarıhyna qatysty qundy dúnıeler jurtshylyq nazaryna usynylady. Onyń ishinde Saraıshyq qalashyǵynyń materıaldyq muralary, dál osy jerden ár kezeńde tabylǵan jádigerler, Altyn Orda týy nemese búginde keıbir elderdiń memlekettik eltańbalarynda kórinis tapqan qos basty búrkit belgisi qoıylady. Buryn bul belgi Saraıshyqtan tabylǵan edi. Qasym han men Batý hannyń beıneleri alǵash ret osynda kórsetiledi. Bul tulǵalardyń beınelerin jasaý úshin ǵalymdarmen birlesken jumys atqaryldy, – deıdi Ábilseıit Muhtar.
Sapar ortalyǵynda tarıhı qalashyqtyń ǵylymı negizde qaıta jasalǵan biregeı maketin usyný kózdelip otyr. Altyn Orda kezeńindegi Saraıshyqtyń maketin jasaýǵa ǵalymdar kómektesken. Barlyq ekspozısııanyń mýltımedııalyq nusqasy daıyndalǵan. Bul sapar ortalyǵyna keletin qonaqtardyń qazaq, orys jáne aǵylshyn tilderinde aqparat alýǵa jol ashady.
– Qazaqstanda elimizdiń ótkeninen syr shertetin kıeli de tarıhı oryndar kóp. Sondaı oryndarǵa azamattarymyz ǵana emes, sheteldik týrıster de úlken qyzyǵýshylyq tanytady. Alaıda tarıhı jáne arheologııalyq eskertkishter ornalasqan aýmaqta týrıstik ınfraqurylym joqtyǵy týrızmdi damytýǵa qolbaılaý bolyp otyr. Al kóne Saraıshyq aýmaǵynda ashylatyn sapar ortalyǵy elimizdiń baı mádenı jáne tarıhı murasyna nazar aýdartyp, týrızmdi jandandyrýǵa septigin tıgizedi, – dedi Altaı Kólginov.
Atyraý oblysy