Premer-mınıstr Álıhan Smaıylov pen AQSh elshisi Denıel Rozenblıým Qazaqstan Respýblıkasy men Amerıka Qurama Shtattary arasyndaǵy ekijaqty yntymaqtastyqtyń ózekti máselelerin talqylady, dep habarlaıdy Egemen.kz Úkimet basshysynyń baspasóz qyzmetine silteme jasap.
Taraptar saýda-ekonomıka salasyndaǵy qazirgi jaǵdaıdy jáne energetıka, kólik-logıstıka, aýyl sharýashylyǵy, densaýlyq saqtaý, bilim berý, ekologııa salalaryndaǵy qarym-qatynastardy nyǵaıtý perspektıvalaryn jáne basqa da máselelerdi talqylady.
Premer-mınıstr Qazaqstan AQSh-ty ekijaqty jáne kópjaqty formattaǵy strategııalyq seriktesi sanaıtynyn atap ótti. Búginde Qazaqstanda 900-den astam birlesken kásiporyn tabysty jumys istep jatyr.
«Biz Amerıka Qurama Shtattarymen buǵan deıingi tıimdi yntymaqtastyǵymyzdy kún tártibindegi keń aýqymdy ózara is-qımyl boıynsha odan ári tereńdetýge jáne nyǵaıtýǵa nıettimiz», dedi Álıhan Smaıylov.
Úkimet basshysy byltyr elder arasyndaǵy taýar aınalymy shamamen 40%-ǵa ósip, 3,1 mlrd dollar bolǵanyn atap ótti. Osy rette Qazaqstan saýda kólemin odan ári arttyrýǵa áleýetti jáne quny 800 mln dollar bolatyn 90 taýar túriniń eksportyn arttyrýǵa daıyn.
AQSh — Qazaqstanǵa tikeleı ınvestısııa tartý boıynsha kóshbasshy elderdiń biri. Byltyr amerıkalyq ınvestısııa eki esege jýyq ósip, 5,1 mlrd dollardan asty. Bul — pandemııaǵa deıingi rekordtyq deńgeıge teń kórsetkish.
О́z kezeginde, Denıel Rozenblıým Qazaqstan-Amerıka qarym-qatynastaryn ortaq múdde negizinde odan ári damytýǵa zor áleýet bar ekenin atap ótti.
«Biz ınvestısııalyq kórsetkishterdi nyǵaıtyp, ekijaqty taýar aınalymyn arttyrǵymyz keledi. AQSh kompanııalary Qazaqstanda túrli salalardaǵy qyzmet aýqymyn keńeıtýge múddeli. Bul taý-ken metallýrgııa kesheni, aýyl sharýashylyǵy, densaýlyq saqtaý salasy, aqparattyq-kommýnıkasııa jáne jasyl tehnologııalarǵa, sondaı-aq kólik salasyna qatysty», dedi Denıel Rozenblıým.
Sondaı-aq ol bıylǵy jazda túrli sektorda qyzmet etetin 20-ǵa jýyq amerıkalyq kompanııa iskerlik maqsatta Qazaqstanǵa kelýdi josparlap otyrǵanyn aıtty.
Kezdesý qorytyndysy boıynsha taraptar yntymaqtastyqtyń ózara tıimdi barlyq baǵyty boıynsha baılanystardy belsendi túrde jalǵastyrýǵa daıyn ekendikterin rastady.