Qazaqstan halqynyń birligi men tirligin, yntymaǵyn pash etetin mereıli mereke kúni Qazaqstan ulttyq sport qaýymdastyǵy, Almaty oblysynyń ákimdigi, Mádenıet jáne sport mınıstrligi men Aqparat jáne qoǵamdyq damý mınıstrliginiń qoldaýymen Panfılov aýyldyq okrýgindegi Qobylandy batyr atyndaǵy ıppodromda ushqyr báıgeden «Qazaq World Cup» týrnıri ótti. Oǵan kórshiles qyrǵyz aǵaıyndardyń jokeıleri qatysty. Qyryqtan astam tuıaǵymen jer tarpyǵan tulpardyń baby men baǵy synalǵan bul ushqyr báıge elimizde tuńǵysh ret uıymdastyryldy.
Jarystyń saltanatty ashylýyna Almaty oblysynyń ákimi Marat Sultanǵazıev qatysyp, báıgeni tamashalaýǵa jıylǵan qaýymdy
1 mamyr – Birlik kúnimen quttyqtady. Sondaı-aq atadan balaǵa jetken ulttyq sportty damytý boıynsha óńirde ıgilikti ister jibin úzbeı jalǵasyp kele jatqandyǵyn, ásirese, ulttyq qundylyqty dáriptep, jastardy jigerlendiretin at sportynyń órisin keńeıtýge árdaıym ákimdik tarapynan qoldaý kórsetiletindigin tilge tıek etken ol báıgege qatysatyn shabandozdarǵa sáttilik tiledi.
– Elimizde kóneden kele jatqan qunan báıge, alaman báıgeniń baryn bilemiz. Biraq, álemde keń taralǵany ushqyr báıge. Sondyqtan halyqaralyq tájirıbeni zerttep, zerdeleı kele ushqyr báıgeniń damýyna úlesimizdi qosyp, nasıhattaýdy bastap kettik. Osy óńirde týyp-ósken shabandoz Baýyrjan Myrzabaevtyń esimi Eýropaǵa áıgili. Onyń talanty talaıdy tamsandyryp júr. Sondyqtan bizdiń elimizden áli talaıdyń tańdaıyn qaqtyrar myqty jokeıler halyqaralyq arenaǵa shyǵyp, elimizdiń kók týyn kókte jelbiretetin bolady, – degen Qazaqstan ulttyq sport qaýymdastyǵynyń prezıdenti Islambek Saljanov ulttyq sporttyń damýyna el Prezıdenti erekshe mán berip, qoldaý kórsetip otyrǵanyn aıryqsha atady.
Ulttyq sporttyń dárejesin arttyryp, halyqaralyq deńgeıge kóterý maqsatynda qurylǵan «Qazaq World Cup» dep atalatyn bul jarystyń júlde qory shamaman 20 mıllıon teńgeden asady. Mamyr aıynan bastaý alǵan jarys qarasha aıyna deıin ár eki apta saıyn uıymdastyrylmaq.
Tuńǵysh ret tusaýy kesilgen «Qazaq World Cup» týrnıri keler jyly elimizde ótetin V Dúnıejúzilik kóshpeliler oıyndaryna daıyndyqtyń bastaýy sanalady.
Sondaı-aq bul kúni báıgeni tamashalaýǵa kelgen kórermender arasynda arqan tartý, qyz qýý, asyq atý syndy ulttyq oıyn túrlerinen jarys uıymdastyrylyp, jeńimpazdarǵa syılyqtar tabys etildi. Tanymal óner juldyzdary kúı kúmbirletip, ásem án shyrqady. Sóıtip, sáni men saltanaty kelisken jarys óz máresine jetti.
Qysqa qashyqtyqta asqan jyldamdyqpen máre syzyǵyn kesken báıge jeńimpazdary arnaıy kýbokpen jáne qarjylaı júldelermen marapattaldy.
Almaty oblysy