Bizdiń el Fransııamen sıfrlandyrý, ǵarysh jáne aeroǵarysh tehnologııalary salasyndaǵy áriptestikti nyǵaıtady. Bul rette fransýzdyq «Airbus Defence and Space» kompanııasymen birlesip, baılanys spýtnıkterin shyǵarmaq.
Fransııaǵa jumys saparymen barǵan elimizdiń Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın sapardyń sátti órilgenin aıtty. Mundaǵy negizgi maqsat – Qazaqstan úshin strategııalyq mańyzy bar salalardaǵy yntymaqtastyqty tereńdetý ári ınnovasııalardy damytý. Kezdesýler aıasynda sıfrlandyrý, aeroǵarysh ónerkásibi salasyndaǵy yntymaqtastyq, sondaı-aq qoljetimdiligi qıyn lokasııalar úshin ınternet qyzmetterin usynýdaǵy ınklıýzıvtilikti damytý máseleleri pysyqtalǵan. Osylaısha, elimizdiń Fransııadaǵy elshiliginiń qoldaýymen uıymdastyrylǵan sapar qos tarap arasyndaǵy yntymaqtastyq pen tájirıbe almasýdy nyǵaıtýdaǵy mańyzdy qadam boldy.
Sapar aıasynda Baǵdat Mýsın Ekonomıkalyq damý jónindegi Qazaqstan – Fransııa úkimetaralyq komıssııasynyń teń tóraǵasy, Syrtqy saýda, ekonomıkalyq tartymdylyq jáne sheteldegi fransýz azamattarynyń isteri jónindegi mınıstr-delegat Olıve Beshtpen, sondaı-aq sıfrlandyrý, aeroǵarysh ónerkásibi salasyndaǵy jetekshi kásiporyndardyń basshylarymen jáne aeroǵarysh tehnologııalary salasyndaǵy sarapshylarmen kezdesý ótkizdi.
– Qazaqstan Fransııa úshin eldiń energetıkalyq qaýipsizdigin qamtamasyz etetin mańyzdy strategııalyq áriptes sanalady. Sonymen qatar ǵarysh ónerkásibi jáne sıfrlandyrý sııaqty ǵylymdy qajet etetin salalardaǵy baılanystardy damytý da mańyzdy, – dedi Olıve Besht.
Sonymen «Thales Alenia» ókilderimen kezdesý barysynda «KazSat» spýtnıkterin jáne paıdalaný merzimin aıaqtaıtyn qashyqtan zondtaý spýtnıkterin almastyrý úshin baılanys spýtnıkterin qurý salasyndaǵy birlesken jobalardyń perspektıvalary, al «Airbus Defence and Space» ókilderimen bolǵan basqosýda qurastyrý-synaý keshenin damytý jáne spýtnıkterdi óndirý máseleleri talqylandy. Nátıjesinde, Qazaqstan fransýz mamandarymen birlesip, baılanys spýtnıkterin shyǵarýdy kózdep otyr. Alǵashqy otandyq qurastyrý apparatyn 2026 jyly iske qosý josparlanǵan.
Sonymen qatar B.Mýsın fransýz áriptesterimen eki eldiń sıfrlandyrý salasyn damytýǵa baǵyttalǵan josparlar men baǵdarlamalardy talqylady. Atap aıtqanda, mınıstr sıfrlyq ınfraqurylymdardyń, jasandy ıntellekt, kıberqaýipsizdik jáne sıfrlyq platformalardy damytýdyń mańyzdylyǵyna toqtaldy.
Sondaı-aq bizdiń delegasııa «One Web», «ReOrbit» jáne «SES» kompanııalarynyń ókilderimen kezdesý ótkizdi. Onda shalǵaıdaǵy eldi mekenderdi baılanyspen qamtamasyz etý úshin sıfrlyq múmkindikterge teń qoljetimdilik jasaý joldary pysyqtaldy. Atalǵan kompanııalar usynatyn tómen orbıtalyq spýtnıktik toptardyń kómegimen qoljetimdiligi qıyn lokasııalardy ınternetpen qamtamasyz etý úshin ártúrli strategııalar men tehnologııalyq sheshimderdi talqylady.
B.Mýsın bul kezdesýler men kelissózder Qazaqstan men Fransııa arasyndaǵy sıfrlandyrý, ǵarysh, aeroǵarysh tehnologııalary salasyndaǵy yntymaqtastyqty nyǵaıtýǵa, sondaı-aq azamattardyń barlyǵy úshin neǵurlym qoljetimdi jáne ınklıýzıvti sıfrlyq ortany qurýǵa serpin beretinine senim bildirdi.
Olıve Besht áýe jolaýshylary týraly derekterdi jınaý júıesin iske asyrýǵa járdemdeskeni úshin bizdiń tarapqa alǵysyn bildirdi. Esterińizge sala keteıik, «Idemia» kompanııasy Qazaqstanda «Qazaqstan Identity & Security» (QIS) birlesken kásiporny arqyly áýe jolaýshylary jaıly derekterdi jınaý boıynsha aqparattyq júıeni (APCAS) engizý jobasyn iske asyryp jatyr. Qazirgi ýaqytta bul joba tájirıbeden ótý ústinde.
– Mınıstrlik sıfrlyq dáýirde turaqty ósý men damýdy qamtamasyz etip, kelisilgen ıdeıalar men josparlardy iske asyrýǵa belsendilik tanyta otyryp óz jumysyn jalǵastyrady. Qazaqstan men Fransııa arasyndaǵy sıfrlandyrý, ǵarysh, aeroǵarysh tehnologııalary jáne shalǵaıdaǵy eldi mekenderdi baılanyspen qamtamasyz etý salasyndaǵy áriptestikti nyǵaıtý – bizdiń el úshin sıfrlyq transformasııa men turaqty damýǵa qol jetkizý jolyndaǵy mańyzdy qadam, – dedi B.Mýsın.
Sondaı-aq osy sapar aıasynda otandyq jobalar Fransııada ornalasqan álemdegi eń aýqymdy «Station F» startaptar ınkýbatorynyń quramyna kirgenin atap óteıik. Sapar barysynda bizdiń delegasııa «Station F» jáne «Thales Digital Factory» sıfrlyq fabrıkasyna bardy. Onda fransýz startaptarynyń ókilderimen kezdesýler, sondaı-aq «Astana Hub» múmkindikteri men jetistikteriniń tusaýkeseri ótkizildi. Otandyq «iDos Games», «Verigram», «Cerebra» jáne «Alaqan» sekildi startaptar da kezdesýge qatysyp, óz jumystaryn tanystyrdy. Syrtqy ister mınıstrliginiń ınnovasııalar jáne serpindi tehnologııalar jónindegi keńesshisi Djeremı El Hatıb startaptarǵa jeke qoldaý kórsetýdi jáne ınvestorlar men Fransııanyń akselerasııa baǵdarlamalaryna shyǵarýdy usyndy.
Osy kezdesýdiń qorytyndysy boıynsha taraptar Qazaqstan men Fransııanyń odan ári yntymaqtastyǵy týraly kelisimge keldi. Atap aıtqanda, otandyq startaptar úshin «Station F» ınkýbasııalyq jáne aktıvasııalyq baǵdarlamalaryna «Fast track» uıymdastyrylady. Bul bizdiń jobalarǵa erekshe nazar aýdarylatynyn kórsetedi. Iаǵnı otandyq jobalar jeke tártippen qaralyp, fransýz ınvestorlary men korporasııalaryna usynylady ári Fransııa naryǵyna shyǵýǵa kómek alady.
Budan bólek «Astana Hub» jáne «Station F» arasynda ózara tájirıbe almasý týraly ýaǵdalastyqtarǵa qol jetkizildi. Bul bizge eýropalyq sarapshylarmen yntymaqtasýǵa jáne eýropalyq naryqqa shyǵýǵa múmkindik beredi. Sondaı-aq Qazaqstan «Astana Hub» bazasynda «Thales Digital Factory» tájirıbesin engizýge nıetti. Bul qadam otandyq korporasııalarǵa kompanııalardyń qajettilikterin óteıtin startaptardy irikteýge, kompanııa sarapshylarymen birlesip ázirlengen akselerasııalardan ótýge jáne jedeldetilgen úlgi boıynsha korporasııalarmen birge ósýge, kelisimsharttar jasaýǵa jol ashady.
«Station F» – álemdegi eń iri startap-kampýs ári Parıj qalasynda ornalasqan jetekshi halyqaralyq kásipkerlik jáne ınnovasııalyq ortalyq. 34 myń sharshy metrden astam aýmaqty alyp jatqan «Station F» startaptardyń, ınvestorlar jáne korporatıvtik seriktesterdiń ósýin yntalandyratyn jáne ınnovasııalyq ıdeıalardyń damýyn qoldaý úshin jınalatyn yntymaqtastyq orta sanalady. Ony prezıdent Emmanýel Makron 2017 jyldyń maýsymynda resmı túrde ashqan bolatyn.
Al «Thales Group» – aeroǵaryshtyq, áskerı jáne teńiz qoldanbalaryna arnalǵan aqparattyq júıelerdi shyǵaratyn halyqaralyq ónerkásiptik top. Bas keńsesi Parıj mańyndaǵy Kýrbevýa kommýnasynda ornalasqan. Kompanııanyń 50-den astam elde keńsesi bar. Al qyzmetkerler sany 80 myńnan kóp. Áskerı maqsattaǵy ónimdi satý kólemi boıynsha (kiristiń 53 paıyzyn quraıdy) kompanııa 2021 jyly álemde 16-orynǵa ıe boldy.