Astana qalasynda 26 mamyr kúni «Halyq zańgeri» jalpyrespýblıkalyq aksııasy bastalady, dep habarlaıdy Egemen.kz Sybaılas jemqorlyqqa qarsy is-qımyl agenttiginiń Astana qalasy boıynsha departamentine silteme jasap.
Is-shara saǵat 17:00-de bastalady. Onyń negizgi maqsaty – halyqtyń quqyqtyq saýattylyǵyn arttyrý jáne tegin zań kómegin kórsetý.
Kez kelgen azamat elimizdiń zań qoǵamdastyǵyndaǵy eń úzdik ókilderden tegin qajetti konsýltasııa ala alady. Olardyń arasynda belgili advokattar, notarıýstar, prokýrorlar, tergeýshiler, sot oryndaýshylary, memlekettik organdardyń basshylary jáne basqalary bar.
Aksııany uıymdastyrýshylar – QR Sybaılas jemqorlyqqa qarsy is-qımyl agenttigi, zakon.kz jelilik basylymy, «Paragraf» aqparattyq júıesi, memlekettik bılik organdary jáne Qazaqstannyń úzdik zańgerleri men advokattary.
«Halyq zańgeri» aksııasy dástúrli is-sharaǵa aınalyp keledi, al oǵan alǵys bildiretin qazaqstandyqtar qatary artýda. 2016-2022 jyldar aralyǵynda aksııaǵa 7000-nan astam úzdik sarapshy jáne memlekettik organdardyń sheshim qabyldaı alatyn quzyretke ıe ókilderi qatysty. Quqyqtyq kómekke júgingen 150 000-nan astam azamat konsýltasııa aldy.
Aksııa ótkiziletin oryn: Astana qalasy, Kenesary, 32 úı, E.Rahmadıev atyndaǵy Memlekettik fılarmonııa ǵımaraty. Kirý tegin.