Erligi urpaǵymyzǵa ár kez úlgi
«Halyq qaharmany», qazaqtan shyqqan tuńǵysh áskerı ushqysh áıel Hıýaz Dospanovanyń erligi men batyrlyǵy, ultjandylyǵy men qaısarlyǵy búginde barshaǵa málim. Qaharman qyzdyń jarqyn beınesin oqýshylarǵa keńinen tanystyryp, olardy otansúıgishtik rýhta tárbıeleý maqsatynda jyl saıyn Atyraý qalalyq bilim berý bólimine qarasty H.Dospanova atyndaǵy jalpy bilim beretin orta mektepte taǵylymdy is-shara uıymdastyrylyp keledi. Bıylǵy is-shara Hıýaz Qaıyrqyzynyń 101 jyldyǵyna arnalyp, «Qanatty qyz Hıýaz» taqyrybynda ótti.
Mádenı-tanymdyq jıynǵa jınalǵandar áskerı ushqysh qyzdyń arýaǵyna taǵzym etip, bir mınýt únsizdikpen eske aldy. Bıyl mekteptiń 7 «A» synyby janynan «Hıýaz» mamandandyrylǵan jas sarbazdar klýby ashylǵan bolatyn. «Jas sarbaz» klýby – bilim berý uıymdarynyń qurylymdyq bólimshesi. Bul synypta kásibı baǵyttalǵan úzdiksiz bilim berý baǵdarlamasy júrgiziledi.
Merekelik is-sharaǵa kóptegen qonaq qatysty. Onda Atyraý qalasy ákiminiń orynbasary N.Ermuhanov, Atyraý qalasy Ardagerler keńesiniń tóraǵasy K.Qosybaev, PO-2 «Hıýaz» ushaǵy modeliniń konstrýktory E.Qydyrov, hıýaztanýshy jýrnalıst T.Qalımova, t.b. sóz sóılep, jetkinshekterdiń ultjandylyq baǵytynda tálim-tárbıe alýlaryna tilektestikterin bildirdi. Al is-sharaǵa Aqtóbe qalasynan arnaıy kelgen «Álııa gúli» qazaq bı ansambliniń (kórkemdik jetekshisi ári baletmeısteri Sh.Aınabekova) óneri kópshiliktiń kóńilinen shyqty.
Mektep tórinen oryn alǵan Hıýaz apamyzdyń eskertkishi onyń ómiri men erligin keler urpaqqa máńgilik ónege etip turǵandaı áser qaldyrdy.
Rýslan HAMZA,
Qazaqstan Jýrnalıster odaǵynyń múshesi
ATYRAÝ
Rýhanı qundylyqtarmen tanysty
Murajaılardyń keıingi urpaqty eljandylyqqa, otanshylyqqa tárbıeleýde, jurtshylyqqa tarıhı-tanymdyq, aǵartýshylyq qyzmet kórsetýde alatyn orny erekshe ekeni belgili. Osy rette Baızaq aýdandyq probasııa qyzmetiniń esebinde turǵan, qoǵamnan oqshaýlaýǵa baılanysty emes jaza túri taǵaıyndalǵan azamattardyń boıyna rýhanı baılyqtyń uryǵyn seýip, mádenı kózqarasyn qalyptastyrý maqsatynda aýdandyq tarıhı-ólketaný mýzeıinde Halyqaralyq eskertkishterdi qorǵaý kúnine oraı is-shara uıymdastyryldy. Oǵan Jambyl oblysy Qylmystyq atqarý júıesi departamenti (QAJD) Baızaq aýdandyq probasııa qyzmeti bóliminiń bastyǵy, ádilet kapıtany Tımýr Moldataev bastaǵan aýdandyq probasııa qyzmetiniń esebinde turǵan, qoǵamnan oqshaýlaýǵa baılanysty emes jaza túri taǵaıyndalǵandar qatysty.
Is-shara barysynda tarıhy ǵasyrlar tereńinen syr shertetin, aýdannyń keshegisi men búgingisin aıshyqtaıtyn «Arheologııa», «Dańq», «Aýdan tarıhy», «Etnografııa», «Mádenıet jáne sport» zaldary tanystyryldy. Mýzeıge kelgender sonymen qatar aýdan ortalyǵy Sarykemer aýylynyń basty kóshesindegi «Batyrlar alleıasynda» aýdannan shyqqan 27 Sosıalıstik Eńbek Eriniń jáne Keńes Odaǵynyń Batyry Aqádil Sýhanbaevtyń, beıbit kúnde erlik jasaǵan «Halyq qaharmany» Ǵazız Baıtasovtyń, Máskeý Olımpıadasynyń chempıony, Qazaqstannyń Eńbek Eri Jaqsylyq Úshkempirovtiń ómir joldarynan aqparat aldy.
Probasııalyq baqylaý belgilengen azamattar is-sharadan jaqsy áser alǵandaryn, rýhanı turǵydan baıyp, qundy aqparattarmen tanysqandaryn aıta kelip, uıymdastyrýshylarǵa alǵystaryn jetkizdi.
Aınagúl MAMYTBEKOVA,
aýdandyq tarıhı-ólketaný
mýzeıiniń ǵylymı qyzmetkeri
Jambyl oblysy,
Baızaq aýdany
Ardager sportshy atyndaǵy týrnır
Sport – densaýlyq kepili. Elimiz táýelsizdigin alǵan ýaqyttan beri shalǵaıda jatqan teriskeı óńirinde de buqaralyq sport kesheni men alańdar salynyp, paıdalanýǵa berilip jatyr. Kóptegen jas sportshy respýblıkalyq, oblystyq birinshilikterde júldeli oryndardan kórinip júr.
Kezinde osy Sozaq aýdanynan shyqqan oqýshylardyń «Shalqar» fýtbol komandasy Armenııa astanasy Erevan qalasynda ótken búkilodaqtyq jarysta respýblıka namysyn qorǵaǵan bolatyn. Bir qyzyǵy, belgili fýtbol kommentatory sozaqtyq jas fýtbolshylardyń oıynynan arnaıy reportaj júrgizgen kórinedi.
Sozaq sportyna eńbek sińirgen jandardyń biri – Tobaqabyl О́mirzaqov. Jyl saıyn kóktem aıynda qazaq kúresinen onyń atyndaǵy oblystyq jarys ótip turady. Taıaýda aýdan ortalyǵy Sholaqqorǵan aýylynda dástúrli týrnır jalǵasyn tapty. Túrkistan oblysynyń 10 aýdanynan kelgen balýandardyń ónerin jurtshylyq qyzyǵa tamashalady. Jeńimpazdarǵa arnaıy taǵaıyndalǵan júldeler men syılyqtar tapsyryldy.
Biz áńgime etip otyrǵan Tobaǵań – osy teriskeı óńiriniń tól týmasy. Kezinde qazaq kúresinen Orta Azııa chempıony bolǵan, KSRO men Qazaq KSR-iniń sport sheberi, Qazaq KSR-iniń eńbek sińirgen jattyqtyrýshysy.
Teriskeı sportynyń ardageri T.О́mirzaqov Sozaq aýdanynyń qurmetti azamaty. Qazaqstan Respýblıkasy Bilim berý isiniń úzdigi. Sport salasyndaǵy eleýli eńbegi eskerilip, Qazaqstan Respýblıkasy Ulttyq Olımpıada komıtetiniń tósbelgisimen marapattalǵan.
Seksenniń seńgirine qadam basqan T.О́mirzaqov áli de tyń. Sport pen qalamdy ushtastyra bilgen ol – Jýrnalıster odaǵynyń múshesi, ártúrli janrdaǵy onǵa tarta kitaptyń avtory. Tobaǵańa qarap, sporttyń ár kez jastyq syılaıtynyna kóz jetkize túsesiń.
Káribaı ÁMZEULY,
zeınetker
Túrkistan oblysy