31 mamyr – saıası qýǵyn-súrgin jáne asharshylyq qurbandaryn eske alý kúnine oraı Batys Qazaqstan oblysynyń Qaztalov aýdany ortalyǵynda «Beseýdiń haty» eskertkish taqtasy ashyldy.
«Beseýdiń haty» – qazaq dalasynda «kishi oktıabrdiń» qara daýyly soǵyp, qalyń jurt jappaı asharshylyqqa ushyraǵan kezde shyqqan zııalylardyń janaıqaıy bolatyn. 1930 jyldary qoldan uıymdastyrylǵan zymııan saıasatqa qarsylyq bildirgen Ǵabıt Músirepov, Mansur Ǵataýlın, Embergen Altynbekov, Mutash Dáýletqalıev, Qadyr Qýanyshev syndy qazaq oqyǵandary Stalınge hat jazady. Sol zamannyń shyńǵyrǵan shyndyǵyn kórsetken narazylyq haty sol kezde el basqarǵan Goloshekınniń qolyna túsken. Árıne, onyń sońy tragedııamen aıaqtaldy. Hattyń jazylýyna túrtki bolǵan Halkom Keńesiniń tóraǵasy Oraz Isaev ta, «Beseýdiń hatyn» óz moınyna alǵan Mansur Ǵataýllın de «otyz jetiniń» qandy qyrǵynynda atylyp ketti. Halyq jazýshysy Sherhan Murtaza osy bir tarıhı oqıǵa jaıynda «Beseýdiń haty» atty drama jazyp, jas urpaqqa tálim berer, halyq qasiretin uqtyrar týyndy qaldyrǵan bolatyn.
Osy oqıǵadaǵy Mansur Ǵataýllın – dál osy Qaztalov aýdanynyń týmasy edi. Jerlesteri el basyna kún týǵan syn sátte basyn qaterge tigip alǵa shyqqan batyr uldy maqtanysh etedi. Qaztalov aýylynyń ortalyǵyndaǵy «Jeńis» saıabaǵynda boı kótergen tarıhı eskertkish aýyl turǵyndarynyń patrıottyq seziminiń kórinisindeı. Akademık, sýretshi Maqsut Ismaǵulovtyń jobasy boıynsha jasalǵan eskertkish taqta qarapaıymdylyǵymen kóz tartady. Shaǵyn kompozısııada aq pen qara tús klassıkalyq turǵyda úılesim taýyp tur. Hat avtorlarynyń esimi jazylǵan taqta qustyń syńar qanatyna uqsaıdy. Sol arqyly avtor zobalań jyldardyń zorlyǵyn kórsetken.
Taqtanyń ashylý saltanatynda sóz sóılegen Qaztalov aýdany ákimi Aslanbek Sarqulov óńirde Prezıdent tapsyrmasyna oraı tarıhı ádildikti qalpyna keltirý, saıası qýǵyn-súrgin qurbandaryn aqtaý boıynsha jumystarǵa jergilikti azamattardyń da atsalysyp jatqanyn aıtty.
- Saıası qýǵyn-súrgin men asharshylyq taqyrybyn qozǵaǵan kezde biz «Beseýdiń hatyn», jerlesimiz Mansur Ǵataýllındi oıǵa alamyz. El men jer tarıhyn joqtap júretin Serik Jumaǵalıev, Ýálıolla Ábishev syndy ólketanýshylarymyzdyń bastamasymen, halyqtyń qoldaýymen búgin osy eskertkish taqtany ashyp otyrmyz. Osy saýapty iske qoldaý kórsetken barsha janǵa sheksiz rızashylyǵymdy bildiremin, - dedi aýdan ákimi.