Búgin Oqý-aǵartý mınıstri Ǵanı Beısembaev Astana qalasyndaǵy №8 mektep-lıseıinde ótken saltanatty jıynǵa qatysty. Is-shara barysynda BAQ ókilderimen suhbattasqan mınıstr ózi oqýshy bolǵan kezin eske aldy, dep habarlaıdy Egemen.kz.
Mınıstrdiń aıtýynsha, ata-anasynyń kóńilinen shyǵý úshin ol únemi minsiz oqýǵa tyrysqan. Al anasy jaqsy baǵa alǵan balasyn erkeletip, dámdi taǵamdardar pisirip beretin.
«Meniń ata-anam, ásirese anam meniń baǵalarymdy qadaǵalap otyratyn. Men jaqsy baǵa alǵan saıyn anam tátti men toqash pisiretin», dedi Ǵanı Beısembaev.
Mınıstr únemi tórt pen beske oqyǵanyn aıtty. Biraq bir ret «ekilik» alǵanyn jasyrmady.
«Men 11-synypta «Bastapqy áskerı daıyndyq» pánine qatysa almadym. Arnaıy formam bolǵan joq. Sol sebepti «ekilik» alǵanmyn», dedi Beısembaev.
Mınıstrdiń aıtýynsha, ol óziniń mektepten túlep ushqan sátin esinde jaqsy saqtaǵan. Biraq sol jyldary túlekter úshin bitirý keshi uıymdastyrylmaǵan.
«Meniń mektep bitirgenime 30 jyldan asyp ketti. Bizdiń ýaqytta eshqandaı merekelik sharalar bolǵan joq. Biraq muǵalim atanǵan sátten bastap balalarmen birge qýanatynmyn», dedi mınıstr.
Ǵanı Beısembaevtyń aıtýynsha, sońǵy qońyraýdyń 1 maýsymǵa aýystyrylýy mektep oqýshylary men olardyń ata-analarynyń kóńil-kúıine áser etken joq.