Batys Qazaqstan oblysy Terekti aýdanyna qarasty Novopavlovka aýyldyq okrýginiń ataýy Qumaqsaı bolyp ózgerip, tarıhı ataýyn qaıtardy.
«Qumaqsaı» – HIH ǵasyrda Barbastaý ózeniniń jaǵalaýynda bolǵan qazaq aýyly eken. HH ǵasyrdyń basynda bul jerge ishki Reseıden kóship kelgen «qarashekpendiler» ornalasyp, jańa qonysqa ózderi týyp-ósken derevnıanyń ataýyn qoıǵan. Árıne, táýelsizdik jyldaryndaǵy demografııalyq ózgerister bul aýyldy qaıtadan qazaqylandyryp, mán-mazmunyn ózgertip jibergen. Endi, mine, aýyldyń ataýy da ózgerip, tarıhı ádilettilik ornady.
– Sońǵy 5 jyl ishinde bir aýdan, 36 eldi meken, 932 kóshe, 40 mektep ulttyq tanymǵa jaqyn ataýlarǵa ózgertildi, – deıdi Batys Qazaqstan oblysy mádenıet, tilderdi damytý jáne arhıv isi basqarmasy onomastıka jáne kórneki aqparattardy baqylaý bóliminiń basshysy Izbasar Jumaǵalı.
Kóp keshikpeı Jańaqala aýylyndaǵy kásiptik-tehnıkalyq kolledji – belgili qoǵam qaıratkeri Seıitqalı Meńdeshevtiń, Karmanov orta mektebi – Dinmuhamed Qonaevtyń, Báıterek aýdanyndaǵy Chebotarev orta mektebi – kúıshi Qurmanǵazy Saǵyrbaıulynyń esimin ıelenýi múmkin. Sondaı-aq Bórli aýdanyndaǵy Aleksandrov orta mektebi – Dostyq, Báıterek aýdanyndaǵy Kırov jáne Podhoz mektepteri – Bolashaq jáne Jalyn negizgi orta mektebi dep atalmaq. Bul usynystar Batys Qazaqstan oblysy ákimdiginiń 2023 jylǵy 31 mamyrdaǵy №124 qaýlysy jáne Batys Qazaqstan oblystyq máslıhatynyń 2023 jylǵy 31 mamyrdaǵy №3-4 sheshimine sáıkes respýblıkalyq onomastıkalyq komıssııanyń qaraýyna joldanǵan.
О́ńirdegi jer-sý ataýlary salasynda aqparattyq-nasıhattyq jumystardy júrgizý maqsatynda qoǵamdyq pikir kóshbasshylarynyń qatysýymen «Onomastıka – memlekettik ıdeologııanyń negizi» taqyrybynda keshendi kezdesýler, «Men turatyn kósheniń tarıhy» aksııasy, «Onomastıka – el aınasy» keshendi is-sharalar júıeli ótip turady. Kórneki aqparattardy rásimdeýde ádistemelik kómek kórsetý úshin «Tilge qurmet» qoǵamdyq til ınspeksııasy da óz jumysyn nátıjeli atqaryp júr. Máselen, qazirge deıin 400-ge jýyq bilim uıymy men kásipkerlik nysanyna «Qazaqstan Respýblıkasyndaǵy tilder týraly» zańynyń 21-baby túsindirilip, ádistemelik kómek kórsetilip, zań buzýshylyq joıylǵan.
Degenmen, Batys Qazaqstan oblysynda ıdeologııalyq turǵydan eskirgen nemese mán-maǵynasyn joǵaltqan áli de 67 eldi meken, 600-ge jýyq kóshe, 48 mektep bar eken. Sondyqtan óńirdegi onomastıkalyq jumystar jalǵasady.
Batys Qazaqstan oblysy