Jýyrda Qaraǵandyda jańa oblystyq balalar klınıkalyq aýrýhanasy esigin aıqara ashty. Kóp jyldan beri qurylysynda kedergilerge tap bolǵan aýrýhana táýlik boıy 200 balany qabyldap, em-dom jasaýǵa qaýqarly. Munda barlyǵy 450 dáriger em júrgizedi. Jabdyqtary ozyq. Sonymen qatar aýrýhana qatary travmatologııa-ortopedııa, neırohırýrgııa jáne jaqsúıek-bet hırýrgııasy bólimshelerimen tolyǵa tústi. Aýrýhana dırektorynyń aıtýynsha, buǵan deıin ondaı naýqastar múmkindik joqtyqtan Astanaǵa, ıa bolmasa H.Maqajanov atyndaǵy klınıkaǵa jiberiletin.
«Budan bylaı endi ózimiz emdeımiz. Eki neırohırýrg pen bir jaqsúıek-bet hırýrgi Izraılge, Germanııaǵa oqýǵa barady. Olar jańa apparattarmen jumys isteýdi úırenedi», deıdi aýrýhana dırektory Arǵyn Bıdaıbaev. Al dárigerlerdi oqytýǵa bıýdjetten arnaıy qarajat bólinip otyr.
Densaýlyq saqtaý basqarmasy basshysy Bıbigúl Tólegenova ol somanyń 200 mln teńge kóleminde ekenin atady. Dárigerlerdiń biliktiligin shyńdaý munymen shektelmeıdi. Aldaǵy ýaqytta osynda sheteldik dárigerler arnaıy shaqyrylatyn bolady. Olar bizdiń mamandarǵa sheberlik synyptaryn ótkizedi. Osylaısha, balalardy emdeý damı túspek.
Jalpy, aýrýhanada maman tapshylyǵy joq. Basqarma aýrýhanada 128 pedıatrdyń, 136 medbıkeniń tolyqtyǵyn jetkizdi. Aýrýhana kópsalaly bolǵandyqtan, onda josparly em, shuǵyl kómek sekildi barlyq qyzmet kórsetiledi.
«Jabdyqtardyń barlyǵy zamanaýı. KT bar, MTR kúzge qaraı keledi. Japonııadan arnaıy ákelingen jeti tósek bar. Ol kúıik shalǵan balalarǵa arnalǵan. Kúıik shalǵan balalar jıi túsedi. Bul tósek balanyń terisi men súıegi oıylmaýyna yńǵaılanǵan ári bakterııalardy zararsyzdandyrady. Birinshi qabatta da, tórtinshi qabatta da reanımasııalyq palatalar bar. Operasııalyq palatalar derbes jeldetýmen qamtamasyz etilgen. Bul «taza júıe» dep atalady.
Aýrýhanada oqytý synyptary da qarastyrylǵan. Bir jyldary pedıatrııa boıynsha oqytý toqtap qalǵan bolatyn. Qazir ol qaıta qolǵa alyndy. Oqytý synyptarynda Qaraǵandy medısına ýnıversıtetiniń pedıatrııa fakýltetinde bilim alatyndar oqıtyn bolady», deıdi Bıbigúl Tólegenova.
Quzyrly oryndardyń málimdeýinshe, aýrýhana mańyna Prıshahtınskidegi perınataldyq ortalyq ta kóshiriledi. Basqarma bıyl jańa perınataldyq ortalyq jobasyn sátti qorǵaǵan. Jańa joba 12 perınataldyq ortalyq jobasynyń qatarynda. Onyń qurylysy 2025 jylǵa mejelengen. Al 14 gektar jer Qaraǵandy medısına ýnıversıteti klınıkasynyń qurylysyna bólinipti. Klınıka qujattary Densaýlyq saqtaý mınıstrligine usynylǵan eken. Qorytyndy shyqsa, qurylys keler jyly bastalady.
Qaraǵandy