«Sizderge joldap turǵan depýtattyq saýalymdy 3 myń balanyń kóz jasy, 6 myń ata-ananyń sońǵy úmiti dep qabyldańyzdar. Elimizde 3 myń bala mıkrotııa jáne atrezııa patologııasyna shaldyqqan. Qarapaıym tilmen aıtsam, bul sábıler qulaqsyz týǵan», dedi Nartaı Sársenǵalıev.
Depýtattyń aıtýynsha, bir qulaqsyz týatyn bóbekter Qazaqstanda múgedek sanatyna jatqyzylmaıdy. Sáıkesinshe, olarǵa járdemaqy men zeınetaqy tólenbeıdi. Osy tusta májilismen Qazaqstanda múgedektik alý úshin eki qulaq ta bolmaýy kerek ekenin aıtty.
Aıta ketsek, mıkrotııa jáne atrezııa patologııasynyń emi óte kúrdeli. Qulaqtyń ishine jasalatyn otany AQSh hırýrgtary jasaıdy. О́tken jyly bir qulaqqa jasalatyn operasııanyń quny 99 000 dollar bolǵan, al bıyl 105 200 dollar. Oǵan qosa naýqas 1 aı boıy dárigerlerdiń baqylaýynda bolý kerek.
«Estimeıtin balanyń únin estirteıin dep ata-analary úkimetke júgingen edi. Mynadaı resmı jaýap alypty: «Áleýmettik medısınalyq saqtandyrý qory» KEAQ derekteriine sáıkes mıkrotııa jáne atrezııa patologııasy bar balalar bıýdjet qarajaty esebinen shetelge emdelýge jiberiletin balalar sanatyna jatpaıdy jáne medısınalyq kómek sapasynyń monıtorıngi departamentiniń «Muqtaj naýqastar» tizimine engizilmeıdi». Sońǵy úmitterin arqalaǵan ata-analar aqyrynda «Qazaqstan halqyna» qoryna barypty. Biraq qor da qor qylyp qaıtarypty. Qazaqstanda atalǵan dertti emdeıtin maman joq. Qulaqsyz týǵan, estimeıtin balalardyń janaıqaıyn qulaǵy bar bılik ókilderiniń estıtin kezi keldi ǵoı?», dep qynjyldy depýtat.
Máseleniń sheshimin tabý maqsatynda Nartaı Aralbaıuly óz usynystaryn da ortaǵa saldy.
«Mıkrotııa jáne atrezııa patologııasyna shaldyǵyp, bir qulaqsyz týǵan balalarǵa da múgedektiktiń berilýin qamtamassyz etýińizdi suraımyn. «Qazaqstan halqyna» qory arqyly atalǵan dertti emdeý úshin balalardyń AQSh-qa barýyn qamtamasyz etý qajet, tıisti qarajat bólý kerek. Sheshimdi jedel qabyldaý shart, sebebi bul dert balalardyń ekinshi saý qulaǵynyń estý qabiletin nasharlatyp jiberedi», dedi depýtat.
Sóz sońynda Nartaı Sársenǵalıev qaýipti dertpen kúresý jáne otandyq medısına sapasyn kóterý maqsatynda Qazaqstannyń bilikti dárigerlerin AQSh-qa oqýǵa jiberýdi usyndy.