Dımash Qudaıbergenniń ata-anasy - juldyzdy jup Qanat pen Sveta Aıtbaevtar «Jaqsy adamdarym» baǵdarlamasyna qatysyp, jastyq shaqtarynyń estelikterin aıtyp berdi, dep habarlaıdy Egemen.kz.
Bıyl ónerli otbasynyń shańyraq kótergenine 30 jyl bolady. Juldyzdy juptyń otbasy qurǵan kúnin Qanat Aıtbaevtyń jan dosy, sazger Oral Baıseńgirov kópshiliktiń esine saldy.
«Qanat pen Svetanyń alǵash tanysqan sátine kýámin. Toqsanynshy jyldardyń basynda stýdent arýlar arasynda «Qyz syny» baıqaýyn júrgizdim. Qyzdardy ret-retimen sahnaǵa shyǵýǵa daıyndap jatsam, kórermen arasynan Qanatqa kózim tústi. Moıyny úzilip ketetindeı Svetaǵa qarap otyr eken», dep ázildedi.
Dosynyń sózin rastap, tanysý hıkaıasyn Qanat myrza ózi aıtyp berdi.
«Instıtýtta oqyp júrgende belsendi stýdent boldym. Bir kúni pedagogıkalyq kolledjde «Qyz syny» baıqaýyna ádilqazy bolýǵa shaqyrdy. Úlken oqytýshy-pedagogtermen sol jerde qazylyq ettim. Ineniń kózinen ótetin arýlarymyz ónerlerin kórsetti. Sol baıqaýda qazylar alqasynyń sheshimimen Svetaǵa ekinshi oryn berdik», dedi Dımashtyń ákesi.
Arada eki aptadaı ýaqyt ótedi. Ol kezde áleýmettik jeli joq. Eldiń kóretini – teledıdar.
«Oblystyq arnany qosyp qoıyp, tórt jigit jaldamaly páterimizde tamaq iship otyrsaq, teledıdardan: «Bas júlde ıegeri – Svetlana Tólemisova» dep habarlap jatyr. Sol jerde: «Osy qyzǵa úılenemin» dep ózime sert berdim. Stýdent kúnimde jergilikti telearnada jumys isteıtinmin. Svetany baǵdarlamaǵa shaqyryp júrip, tanysyp aldym», dedi Qanat Aıtbaev.