Mysyrdyń Gıza qalasynda qańtardyń 23-28 kúnderi aralyǵynda ótken para ústel tennısinen Fa40 ashyq chempıonatynda otandastarymyz 1 kúmis jáne 1 qola medal jeńip aldy, dep habarlaıdy Egemen.kz.
Sport jáne dene shynyqtyrý isteri komıtetiniń málimetinshe, jarysta aralas jup razrıady boıynsha Talǵat Erekeev pen Altynaı Erjanqyzy kúmis medalǵa qol jetkizdi. Al juptyq razrıadtaǵy saıysta Alı Mahýlbekov pen Talǵat Erekeev qola júlde ıelendi.
Dene múmkindikteri shekteýli tulǵalarǵa arnalǵan sporttyq daıarlaý ortalyǵynyń para ústel tennısinen komanda basshysy Erlan Dosmaılovtyń aıtýynsha atalǵan jarys – Parıj-2024 Paralımpıadasyna qatysý úshin ótken reıtıngtik jarystardyń biri.
«Para ústel tennısinde reıtıngterge upaılar Fa20 jáne Fa40 jarystarynda beriledi. Fa40-tyń ereksheligi reıtıngke joǵary upaılar beriledi jáne jarysqa tek Fa20-da saıysqan sportshylar ǵana qatysa alady. Jalpy jyl kóleminde Fa40 jarystary 5 ret ótse, Fa20 shamamen 20-25 ret ótedi. Jýyrda naýryz aıynda Astanada tuńǵysh ret reıtıngtik Fa20 ashyq chempıonaty ótetin bolady. Oǵan 14 elden 135 sportshynyń qatysatyny josparlanǵan», dedi E. Dosmaılov.
Aıta ketsek, atalǵan Fa40 chempıonatyna 27 elden 190 sportshy qatysty.