Kisi óltirý deregi boıynsha ústinen qylmystyq is qozǵalǵan eks-mınıstr Qýandyq Bıshimbaevtyń burynǵy jubaıy Nazym Qaharman áleýmettik jelide vıdeoúndeý jarııalady, dep jazady Egemen.kz.
Ol jelide belgili bir qoldanýshynyń osydan biraz ýaqyt buryn polısııaǵa jazylǵan aryz negizinde qyzynyń jáne óziniń abyroıyna nuqsan keltirmek bolǵan jazbanyń shyndyqqa janaspaıtynyn málimdep, aryz jazýǵa sebep bolǵan oqıǵany baıandap berdi.
«Feısbýkte 28 aqpan kúni Elena Semenova esimdi qoldanýshy meniń polısııaǵa jazǵan aryzymdy tolyq oqyp, túsinbeı turyp, qyzymnyń abyroıyna nuqsan keltiretin mánde post jarııalady. Ol aıtqandaı meniń qyzym Qýandyq Bıshimbaevtyń ekinshi áıeliniń týysqan aǵasynan eshqandaı zorlyq-zombylyq kórmedi», dedi ol.
Nazym Qaharman Saltanat Núkenovanyń qazasyna qaıǵyra kóńil aıta otyryp, aryzdyń astaryndaǵy oqıǵany eske túsirdi.
2023 jyldyń naýryzynda onyń qyzy men uly Bıshimbaevtyń úıinde bolǵan. Sol ýaqytta bolǵan tóbeleske balalar kýá bolǵan.
«Qyzym qoryqqannan maǵan habarlama jiberdi. Men ol jaqqa barmaı turyp, polısııaǵa habarlastym. Men birinshi kezekte Qýandyqqa ashýlandym, olardyń qaýipsizdigine jaýap berýi kerek edi. Ol jerde ne bolǵanyn bilmedim. 102-ge telefon soǵyp, qyzyma shabýyl jasalǵany týraly polısııaǵa habarlastym. Operator seksýaldyq zorlyq-zombylyq boldy ma, joq pa dep surady. Men oǵan «jaǵdaıdy bilmeımin, ol jerde bolǵan joqpyn, kelińder, anyqtaıyq» dedim», dep túsindirdi Nazym Qaharman.
Keıinnen polısııamen birge júrgizilgen tekserý nátıjesinde Saltanat Núkenovanyń aǵasy qyzyna zorlyq-zombylyq kórsetpegeni belgili bolǵan.
«Málimdeme jasaýshynyń aıtýynsha, Aıtym Amangeldi marqum qaryndasynyń úıine onyń soqqyǵa jyǵylǵan sýretterin alǵannan keıin ǵana kelgen. Sol sátte úıde bolmaǵan jubaılardyń qaıda ekenin Nazym Qaharmannyń balalarynan suraýmen shektelgen», dep qosty eks-mınıstrdiń burynǵy áıeli.
Onyń aıtýynsha, balalardan jaýap alynǵan. Osydan keıin Aıtym Amangeldi balalarǵa qatysty eshqandaı zań buzbaǵan degen qorytyndy jasalǵan.
«Men Aıtym (Aıbek) Amangeldini jaqyn tanymaımyn. Ol qyzymnyń qasyna kelip: «Balaqaı, qatty qorqyp kettiń be? Bári jaqsy ma?» dep suraǵan», degen Nazym Qaharman jelidegi jazbanyń jalǵan ekenin alǵa tartty.