Kúlkili jáne oǵash músinder jasaý HH ǵasyrdyń aıaǵynda sánge aınaldy. Solardyń biri – belgııalyq músinshi Tomas Leroıdyń qolynan shyqqan óner týyndysy.
«Aýyr oılar» dep atalatyn músin 2009 jyly qoladan qashalyp jasalǵan. О́nertanýshylar bul shyǵarmany sıýrrealızm baǵytyna jatqyzady.
Iаǵnı bul músin ádettegi erejelerdiń shekarasyna sáıkes kelmeıdi. Dene pishini qalypty bolǵanymen, basy óte úlken. Aýyr oıdy arqalaı almaı denesi qısaıyp, basy tóńkerilip jatqany talaılardyń tańdaıyn qaqtyrdy. Sebebi adamdar bul músinnen ózderin tanıdy. Rasymen, biz arqalap júrgen eń aýyr júk – ózimizdiń oılarymyz.
Qýys keýde
2013 jyly Fransııanyń Marsel portynda Katalano Brýnonyń músinderi halyqqa tanystyrylyp, á degennen kópshiliktiń kóńilinen shyqty. Solardyń ishinde eń tanymal bolǵany – «Saıahatshylar» dep atalady.
Iá, onyń chemodanynan-aq jıhankez ekenin ańǵarý qıyn emes. Biraq nege keýdesi qýys? Álemdi aralaǵan jannyń ishki álemi de baı bolý kerek edi ǵoı. Sóıtsek, avtordyń aıtpaǵy mynaý eken. Eger qıly-qıly kúnderdi bastan keshken saıahatshynyń eki kózi bárin kórip, bárin baqylaǵanymen, kókiregi kereń bolsa, bári beker degen sóz. Toqsan eldi aralaǵan týrıstiń qııaly jutań bolsa, túıgeni joq dep uǵyńyz. Sanasynda mysqaldaı tańba, júreginde záredeı emosııa qalmaıdy. Qysqasy, kópti kórgenniń bári kósemdik kórsete almaıdy, eger kókiregi oıaý bolmasa. Qazir áleýmettik jeliniń áserinen be eken, halyqtyń shetelge yntyzary erekshe. Sizdiń de Fransııaǵa jolyńyz tússe, Eıfel munarasynan buryn osy bir eskertkishke soqqanyńyz abzal dep oılaımyz.
Jalań aıaq
Býdapeshtegi Dýnaı ózeniniń jaǵasynda júzdegen aıaq kıim jatyr. Bir kórgen adam muny jaǵajaıdyń sáni úshin qoıylǵan eskertkish dep oılaýy múmkin. Biraq olardyń sımvoldyq máni múlde basqa.
Músinniń avtory – Jıýl Paýer. Onyń bul eńbegi soǵys ýaqytynda oqqa ushqan Holokost qurbandaryn eske túsiredi. 1944-1945 jyldary Vengrııa nasıstik partııasynyń músheleri Dýnaı jaǵasynda birneshe myń adamdy atý jazasyna kesken. Atylar aldynda tutqyndardyń aıaq-kıimin sheshý talap etilipti. Sondaı-aq oqty únemdeý úshin 50-60 adamdy bir-birine baılap atqan. 2005 jyly qurban bolǵandardy eske alý úshin ózen jaǵasynda 60 jup temir aıaqkıim ornatyldy. Qurbandardy eske alý úshin jyl saıyn munda myńdaǵan týrıster kelip, sýretke túsip jatady.