Shon Shvarner ókpeniń qaterli isigin jeńip, 7 kontınenttiń eń bıik 7 shyńyn baǵyndyrǵan.
Everesti baǵyndyrýǵa sheshim qabyldaǵan kez kelgen adam sol jolda nebir qaýipke tap bolady. Qatty jeldiń ekpini, otteginiń jetispeýi, boran nemese qar kóshkini. Biraq Shon úshin eshqandaı kedergi joq. Ol – óz ýaqytynda qaterli isikten aıyǵyp qana qoımaı, Hodjkın aýrýy men Askın isigi dıagnozynan aman qalǵan álemdegi jalǵyz adam. On úsh jasynda dárigerler ony ómirmen qosh aıtysýǵa daıyndaǵan edi. Boljam boıynsha ol úsh aı da ómir súrmeýi kerek-tuǵyn. Degenmen Shon óziniń aýrýyn ǵajaıyp túrde jeńip, aıyqty. Biraq kóp uzamaı dárigerler onyń oń ókpesinen golf dobynyń kólemindeı isik tapqanda aýrýhanaǵa oraldy. Isikti joıýǵa arnalǵan ekinshi operasııadan keıin dárigerler Shon eki aptadan aspaıdy dep sheshti...al on jyldan keıin Shon (ókpesi jartylaı ǵana jumys isteıdi) búkil álemge «Everest taýyna kóterilgen, qaterli isikten aman qalǵan alǵashqy adam» retinde tanymal boldy.
Qoly joq ushqysh
Djessıka Koks sırek kezdesetin dertke shaldyqqan. Dúnıege qolsyz kelgen. Taǵdyrdyń tálkegine esh moıymaǵan bul qyzdyń erik-jigeri zor.
Búginde Djessıka jaza alady, kólik júrgize alady, shashyn taraıdy, telefonmen sóılesedi. Tirshilikke qajettiniń kóbin ıgergen. Ol is-qımyldyń bárin aıaqtarynyń kómegimen jasaıdy. Tipti psıhologııa fakýltetin bitirip, bımen de aınalysty. Taekvondodan qos qara belbeýdiń ıegeri. Eń qyzyǵy, Djessıkanyń ushaq júrgizetin kýáligi bar. Kádimgi jartyjyldyqtyń ornyna úsh jyldyq ushaq júrgizý kýrstarynan ótti. Ol basqaratyn ushaq «Encoupe» dep atalady. Pedali joq ushaq. Qazir qaısar qyz 89 saǵattan astam ushý tájirıbesine ıe ári álem tarıhyndaǵy alǵashqy qolsyz ushqysh atandy.
Armany asqaq Avrora
Avrora Skaı ómir esigin túrmede ashqan. Jaryq dúnıege túrme esigi arqyly ótken. Ol abaqtydaǵy anadan týyp, jalǵyzbasty ákeniń tárbıesinde boldy. Al qazir armany bıik qyz Garvard ýnıversıtetinde oqıdy.
Avrora anasymen 14 jasynda bir ret qana sóılesken. Qyz óz betimen bilim alyp, akademııalyq qabiletterin damytqan. Ol Garvardqa tapsyrǵan essesin «Men túrmede dúnıege keldim» dep bastady. Esse sátti jazylǵan dep baǵalanyp, birshama synaqtan keıin zańger mamandyǵyna oqýǵa tústi. О́mirde óz ornymdy tabýǵa, úmit pen senim kómektesti deıdi Avrora. Onyń aıtýynsha, ata-anasy túrmede otyrǵan balalardyń ómiri nashar bastalyp, nashar aıaqtalady. Biraq taǵdyrdyń tosqaýylyn tózim ǵana jeńbek. Jyl saıyn túrmede 2000-ǵa jýyq bala dúnıe keledi eken. Olardyń bári Avrora bola ala ma eken?..