Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń depýtattary elordadaǵy qaıtalama shıkizatty qaıta óńdeý kásiporyndarynda boldy, dep jazady Egemen.kz.
Senatorlar sapar barysynda qaıtalama shıkizatty óńdeýmen aınalysatyn jáne skotch atalatyn jabysqaq taspa daıyndaýǵa mamandanǵan «Marqataı» JShS-niń óndirisimen tanysty. Kásiporynda qaıta óńdelgen materıaldar belsendi qoldanylatyny jáne ónerkásipte, turmys pen keńsede paıdalanýǵa arnalǵan ónimder shyǵarylatyny týraly aıtyldy. Senat delegasııasynyń músheleri sapar barysynda kásiporynda qoldanylatyn tehnologııalyq prosesterdi egjeı-tegjeıli zerdeledi jáne óńirdiń ekonomıkalyq damýy men ekologııalyq turaqtylyǵyna osyndaı óndiristiń mańyzdylyǵyn atap ótti.
Parlamentshiler sondaı-aq «Ecomaf» jáne «Biryńǵaı shoǵyrlandyrý ortalyǵy» kásiporyndarynda boldy. «Ecomaf» kompanııasynda qalalyq jáne jeke aýmaqtardy abattandyrýǵa arnalǵan baý-baqsha jıhazdary men shaǵyn sáýlet nysandary jasalady. Depýtattar ekinshi kásiporynda óndiris tizbegin kórip shyqty jáne onyń ınnovasııalyq tehnologııany damytý men ónimniń qaýipsizdik deńgeıin arttyrýǵa qosqan úlesine toqtaldy. О́ndiriste qaıtalama shıkizatty paıdalaný men zamanaýı ekologııalyq qaýipsiz sheshim qabyldaýǵa erekshe nazar aýdarylatyny aıtyldy.
Sapar aıasynda kásiporyndar basshylyǵymen kezdesýler boldy jáne onda aǵymdaǵy jetistikter men bolashaq damý josparlary talqylandy. Depýtattar mańyzdy bastamalarǵa zańnamalyq deńgeıde jan-jaqty qoldaý kórsetýge daıyn ekendikterin bildirdi. Sapar «Turmystyq qatty qaldyqtar jáne olardy kádege jaratý problemalary. О́ndirýshiniń keńeıtilgen mindettemeleri júıesin odan ári jetildirý máseleleri» taqyrybyna arnalǵan dóńgelek ústel ótkizý aıasynda uıymdastyryldy.