Senat Tóraǵasy Máýlen Áshimbaevtyń qatysýymen «Ulttyq múdde» dıalog alańynyń kezekti otyrysy ótti, dep habarlaıdy Egemen.kz Senattyń baspasóz qyzmetine silteme jasap.
Otyrysta senatorlar zııaly qaýym ókilderimen jáne sarapshylarmen birge qazirgi jahandyq syn-qaterler kezeńinde jalpyulttyq qundylyqtardy qalyptastyrý, jetildirý, dáripteý baǵyttaryndaǵy ózekti máselelerdi talqylady.
Qoǵamdy jalpyulttyq maqsattar men ortaq qundylyqtarǵa jumyldyrý – Ádiletti Qazaqstan qurý jolyndaǵy jasampaz kún tártibin iske asyrýdyń jáne ǵasyrlar boıy qalyptasqan memlekettilikti saqtaýdyń negizgi sharty. Senat Tóraǵasy atap ótkendeı, qazirgi ýaqytta jalpyulttyq qundylyqtardyń zamanaýı áleýmettik-mádenı normalarmen úılesimin tabý álemniń kóptegen elderi úshin mańyzdy mindet.
«Prezıdentimiz Qasym-Jomart Kemeluly Toqaev «Adal adam – Adal eńbek – Adal tabys» ıdeologııalyq tujyrymynda osy baǵyttaǵy negizgi baǵdardy aıqyndap berdi. Olar – Táýelsizdik jáne Otanshyldyq, Birlik jáne Yntymaq, Ádildik pen Jaýapkershilik, Zań men Tártip, Eńbekqorlyq pen Kásibı biliktilik, Jasampazdyq jáne Jańashyldyq. Bul qundylyqtar azamattyq jaýapkershilikti nyǵaıtyp, qoǵamnyń damýyna serpin beretin ulttyq sıpatqa ıe. Sondyqtan olardy dáripteý – barshamyz úshin mańyzdy mindet», dedi Máýlen Áshimbaev.
Sonymen qatar Palata Spıkeri kózdegen maqsattarǵa qol jetkizý úshin atalǵan ıdeologııalyq tujyrymdy oqý baǵdarlamasyna engizý jáne bul qundylyqtardy jastardyń boıyna sińirý jolynda kreatıvti ındýstrııany tıimdi paıdalaný mańyzdy ekenin aıtty.
Is-shara barysynda UǴA akademıgi Ǵarıfolla Esim, L.N. Gýmılev atyndaǵy EUÝ túrkologııa kafedrasynyń professory Amantaı Shárip, zań ǵylymdarynyń kandıdaty Almas Jumaǵalı, «Jastar» ǵylymı-zertteý ortalyǵynyń dırektory Aısulý Ernııazova, IT-sarapshy Tımýr Bektur jáne taǵy basqa sarapshylar sóz sóılep, kóterilgen máselege qatysty pikirlerin bildirdi.