Bul týraly Premer-mınıstrdiń orynbasary Tamara Dúısenova májilismen Nursultan Baıtilesovtiń depýtattyq saýalyna bergen jaýabynda aıtty, dep habarlaıdy Egemen.kz.
Buǵan deıin depýtat sottarda jumys isteıtin aýdarmashylar tómen jalaqy alatynyna nazar aýdarǵan edi.
«Qazirgi ýaqytta azamattyq jáne ákimshilik ister boıynsha aýdarmashylardyń eńbegine aqy tóleý Úkimettiń 1992 jylǵy qaýlysy negizinde júzege asyrylady. Oǵan sáıkes bir betti nemese bir saǵattyq jumysty aýdarǵany úshin 369 teńge tólenedi. Al eger prosess jarty saǵatty alsa, onda tólem osy somanyń jartysyn quraıdy, ıaǵnı 180 teńge», dedi Nursultan Baıtilesov.
Depýtattyq saýalǵa berilgen jaýapta sot isin júrgizý aıasyndaǵy aýdarmalardyń quny aýdarma qyzmetiniń naryqtyq qunynan aıtarlyqtaı tómen ekendigi aıtyldy. Málimetterge súıensek, azamattyq jáne ákimshilik ister boıynsha aýdarmashylarǵa tólenetin syıaqy mólsheri Mınıstrler kabınetiniń 1992 jylǵy 25 aqpandaǵy qaýlysymen retteledi.
«Sot ákimshiligi qalyptasqan jaǵdaıdy retteý úshin sot prosesine qatysatyn aýdarmashylarǵa syıaqy mólsherin ulǵaıtýdy kózdeıtin qaýly jobasyn daıyndady. Qazirgi ýaqytta joba zańnamada belgilengen tártippen qaralyp jatyr», delingen jaýapta.