1 qańtardan bastap engizilgen arnaýly áleýmettik tólemge qazirdiń ózinde 11 myńnan astam adam ótinish bildirgen, dep habarlaıdy Egemen.kz QR Eńbekmınine silteme jasap.
Jyl basynan beri 11 126 azamatqa zııandy eńbek jaǵdaılarynda uzaq ýaqyt jumys istegen adamdarǵa arnalǵan arnaýly áleýmettik tólem taǵaıyndalǵan. Atalǵan tólemdi taǵaıyndaýǵa jalpy 11 816 adam ótinish bildirgen.
Arnaýly áleýmettik tólemdi taǵaıyndaýǵa eń kóp Qaraǵandy, Qostanaı jáne Shyǵys Qazaqstan oblysynyń turǵyndary ótinish bergen.
Eske sala keteıik, arnaýly áleýmettik tólem taǵaıyndaý úshin 55 jasqa tolý jáne Biryńǵaı jınaqtaýshy zeınetaqy qorynda keminde 7 jyl kásiptik zeınetaqy aýdarymdarynyń bolýy mindetti shart bolyp sanalady.
«Tólem zeınetkerlik jasqa deıin tólenedi. Arnaýly áleýmettik tólemderdi alý úshin eńbek jaǵdaılary zııandy jumystarmen aınalyspaýǵa tıis. Jumyskerler jeńil jumysqa aýysa alady, sodan keıin olar jalaqy men tólem alady nemese demalysqa shyǵyp, zeınetke shyqqanǵa deıin arnaýly áleýmettik tólem alady», delingen mınıstrlik túsiniktemesinde.
BJZQ derekteri boıynsha, arnaýly áleýmettik tólemdi taǵaıyndaý úshin mindetti sharttardy eskere otyryp, oǵan 2024 jyly 37 myńnan astam jumysker úmitker bola alady. Jalpy tólemniń ortasha mólsheri 208 myń teńgeden asady. Árbir jumysker úshin tólem mólsheri BJZQ-daǵy jınaqtaryna baılanysty esepteledi.