Fýtboldan Qazaqstan Premer-lıgasynyń 25 týryndaǵy eń qyzyqty oıyn Petropavlovskide ótti. Bul matchta jergilikti «Qyzyljar» Qyzylordanyń «Qaısaryn» 6:2 esebimen utty. Báseke barysynda Kot-d’Ivýardan kelgen legıoner Senın Sebaı het-trık jasady. Al basqa kezdesýlerdiń nátıjeleri mynadaı: «Qaırat» – «Ordabasy» 2:1, «Shahter» – «Aqtóbe» 1:3, «Turan» – «Jeńis» 1:1, «Jetisý» – «Atyraý» 0:2, «Tobyl» – «Astana» 1:0.
Jartylaı orta salmaqtaǵy Shavqat Rahmonov (18-0) 7 jeltoqsanda AQSh-tyń Las-Vegas qalasynda UFC-diń chempıondyq ataǵy úshin amerıkalyq Belal Muhammadpen (24-3) kúsh synasýǵa tıis edi. Alaıda bul jekpe-jek ótpeıtin boldy. Onyń sebebi – chempıonnyń «súıek ınfeksııasy» dertine dýshar bolýy.
Fýtzaldan Chempıondar lıgasynyń elıtalyq kezeńiniń jerebesi tartyldy. «Qaırat» V tobyna tústi. Almatylyqtar «Olmıssým» (Omısh, Horvatııa), «Etýal» (Laval, Fransııa), «Dınamomen» (Zagreb, Horvatııa) sheberlik baıqasady. Bul básekeler 26 qarasha men 1 jeltoqsan aralyǵynda Zagrebte ótedi. D tobyndaǵy «Semeı» «Palma» (Ispanııa, Palma-de-Maıorka), «Rekord» (Belsko-Bıala, Polsha), «Lýchenespen» (Slovakııa) saıysqa túsedi.
Slovakııanyń Senes qalasynda ústel tennısinen WTT Youth Contender týrnıri aıaqtaldy. 11 jasqa deıingi oıynshylar arasyndaǵy básekede Janııa Bekmuhambetova bas júldeni jeńip aldy. Osy jarys barysynda ol Aleksandra Bes (Ýkraına), Iýlııa Vchelkova (Slovakııa), Selestına Kapatı (Sıngapýr), Sofııa Trýskova (Slovakııa), Emılı Vý (Shveısarııa), Aıalgýý Erdenehýıag (Mońǵolııa) syndy sportshylardy utty.
Fransııanyń Anje qalasynda mánerlep syrǵanaýdan Gran-prı týrnıri aıaqtaldy. Bul jarysta jerlesimiz Mıhaıl Shaıdorov tórtinshi oryndy qanaǵat tutty. Ol 231,86 upaı jıdy. Bas júldeni amerıkalyq Endrıý Torgashev (233,64) oljalasa, kúmis pen qola medaldy japonııalyq Koshıro Shımada (233,84) men fransııalyq Adam Sıao Hım Fa (246,58) ıelendi.