Halyqaralyq deńgeıdegi shara elimizdiń Saýda jáne ıntegrasııa mınıstrligi jáne «Atameken» Ulttyq kásipkerler palatasynyń qoldaýymen uıymdastyryldy. Kórmege qoıylǵan ónimder negizinen saýda jelileri men market-pleısterge arnalǵan. Oǵan 20 elden 200-ge jýyq túrli sheteldik kompanııa qatysyp, ózderi shyǵarǵan ónimderin usyndy, dep habarlaıdy Egemen.kz.
NON-FOOD ASIA EXPO kórmesi osymen elimizde úshinshi ret ótip jatyr. Bul shara osy ýaqyt ishinde satylymnyń kólemi men aýqymyn keńeıtýge, tapsyrys berýshiler bazasyn ulǵaıtýǵa múmkindik jasady. Sondaı-aq, Eýrazııalyq Ekonomıkalyq Odaq elderiniń iri bólshek saýda jelilerine, marketpleısterge, sheteldik jáne otandyq taýar óndirýshiler arasynda baılanys ornatatyn tıimdi alańǵa aınaldy.
Saýda jáne ıntegrasııa mınıstriniń birinshi orynbasary Aıjan Bıjanovanyń aıtýynsha, kórme ishki jáne syrtqy saýda aınalymynyń ósýine oń yqpal etedi.
«Jalpy biz óndirýshiler men bıznesmender bir-birimen qarym-qatynas ornatyp, sol arqyly taýar aınalymyn, halyqaralyq saýda aınalymyn jaqsartsa eken deımiz. Iskerlik bastamalaryn qoldaımyz. Iаǵnı bul kórme qosymsha ınvestısııa tartatyn dıalog alańyna aınaldy desek te bolady. Munda úıge kerektiń bári bar. Turmystyq hımııa ónimderi men kosmetıkadan bastap, balalar oıynshyqtaryna deıin qoıylǵan. Atap aıtqanda, tikeleı óndirýshiler men naryqta keńinen tanymal kompanııalardyń 300-den astam brendin kóre alasyz», dep atap ótti Aıjan Bıjanova.