Prezıdenttiń «Keleshek» erikti jınaqtaý júıesin engizý jónindegi bastamasyn iske asyrý maqsatynda memlekettik bilim berý jınaqtaý júıesi salasynyń operatory – «Qarjy ortalyǵy» men Q.Sátbaev atyndaǵy qazaq ulttyq tehnıkalyq zertteý ýnıversıteti memorandýmǵa qol qoıdy.
«Qazaqstan Respýblıkasynyń keıbir zańnamalyq aktilerine Memlekettik bilim berý jınaqtaý júıesi, aqparat, qoǵamdyq damý, mádenıet jáne arhıv isi salalarynda artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» zańyna sáıkes bıyldan bastap 5 jasqa tolǵan balalarǵa birjolǵy bastapqy bilim berý kapıtaly tólene bastaıdy.
«Keleshek» erikti jınaqtaý júıesi – balalar 18 jasqa tolǵanǵa deıin qarjylyq resýrstardy turaqty túrde jınaqtaýdy qoldaýǵa arnalǵan memlekettiń qosymsha tetigi. Jastardyń elde jáne shetelde bilim alý qyzmetteri úshin, onyń ishinde joǵary bilim, sondaı-aq tehnıkalyq jáne kásiptik bilim alýda jınaqtaý júıesine qatysýǵa ata-analar bankten depozıt ashady. Sonymen birge Memlekettik bilim berý jınaqtaý júıesiniń múshesi sanalatyn ómirdi saqtandyrý kompanııalarymen kelisimshart jasaýǵa tıis. Bala 5 jasqa tolǵan kezde memleket 60 aılyq eseptik kórsetkish mólsherinde bastapqy bilim berý kapıtaly bólinedi (bıyl bul kórsetkish 235 920 teńge), al jetim balalar úshin 120 AEK (471 840 teńge), sondaı-aq jyl saıyn 5-7 paıyz kóleminde memlekettik syıaqy jáne de qatysýshy banktiń syıaqysy nemese ómirdi saqtandyrý kompanııasy shartynan bólinetin ınvestısııalyq kiris tólenedi. «Keleshek» júıesiniń sharty – ata-analardyń 12 nemese 24 AEK-ten kem emes mólsherde engizetin jyl saıynǵy mindetti jarnasy. Al asyrýshysy joq balalar úshin jyl saıynǵy jarna talap etilmeıdi.
«Memleket basshysynyń tapsyrmasyn iske asyrý maqsatynda qolǵa alynǵan «Keleshek» biryńǵaı erikti jınaqtaý júıesi balalardy 18 jasqa tolǵanǵa deıin qarjylyq resýrstardy turaqty túrde jınaqtaýdy qoldaýǵa arnalǵan memlekettiń qosymsha tetigi. Onyń maqsaty – jastardyń elimizde jáne shetelde bilim alýyn qamtamasyz etý. Memorandýmǵa qol qoıý arqyly biz jastardyń bilim alýy men damýyna qolaıly orta qalyptastyrýǵa qadam jasap otyrmyz. Joǵary bilim alý – keleshek mamandyqqa bastaǵan jol ǵana emes, sondaı-aq jastardyń boıyndaǵy áleýeti men qabiletin iske asyrýyna, elimiz damýyna óz úlesin qosýǵa berilgen múmkindik. Eger de bolashaq túlek grantpen oqýǵa túsip ketetin bolsa, onda jınaqtaý qoryndaǵy jınaqtaryna baspana ala alady. Bul balalardyń bolashaqta áleýmettik jaǵdaıynyń jaqsarýyna da úlken qoldaý bolmaq», dedi «Qarjy ortalyǵy» AQ basqarma tóraǵasy Asqar Ibraımov.
Baǵdarlamaǵa qatysatyn bolashaq túlekterge eleýli jeńildikter qarastyryp otyrǵan joǵary oqý orny Sátbaev ýnıversıteti «Keleshek» erikti jınaqtaý júıesine qatysýshylarǵa 20-50 paıyzǵa deıin jeńildikter retin jarııalady. Naqty aıtqanda, ata-anasynyń qamqorlyǵynsyz qalǵan talapkerlerge oqý aqysynyń jalpy somasynan – 50, kópbalaly otbasynan shyqqan talapkerlerge – 30, turmys jaǵdaıy tolyq qamtylmaǵan otbasynan shyqqan talapkerlerge – 25, basqa sanattaǵy talapkerlerge 20 paıyzǵa deıin jeńildikter beriledi.
Rektor Meıram Begentaev: «Keleshek» baǵdarlamasyn iske asyrý – Memleket basshysynyń bastamasyn qoldaý ǵana emes, bul eń aldymen, jastardyń bilimge qoljetimdiligin qamtamasyz etý baǵytyndaǵy negizgi maqsat-múddemizdi iske asyrý bolyp tabylady. Biz tehnıkalyq bilim berýdi sapaly ári qoljetimdi etip, jastar ómirin jaqsartatyn jańa ınnovasııalar jasaýǵa tyrysyp jatyrmyz. Sondyqtan da baǵdarlamaǵa qatysýshylarǵa qarjylyq jeńildikter usyna otyryp, sapaly, zamanaýı bilim alyp, ǵylymı qaýymdastyqtan óz ornyn alýyna qolaıly múmkindikter usynamyz», dedi ol.
Akademııalyq máseleler jónindegi prorektor, tehnıka ǵylymdarynyń doktory, professor Raısa О́skenbaevanyń aıtýynsha, qazirgi kezde ýnıversıette bilim alyp jatqan 14 myń stýdenttiń 70 paıyzy grantta oqıdy. Desek te, grant qarastyrylmaǵan mamandyqtar bar. Bolashaq túlekter óz tańdaǵan baǵytynda bilim alýyna ýnıversıtet úlken jeńildikter bere otyryp, olardyń jańa zaman mamany bolýyna qolaıly jaǵdaı týǵyzyp otyr. «Keleshek» baǵdarlamasy arqyly tehnıka salasyndaǵy ozyq mamandyqtardy ıgerýge múmkindik alýymen qatar, jınaqtaý qoryndaǵy qarjysyn baspana jaǵdaıyn jaqsartýǵa, shetel oqý oryndaryna túsýge de paıdalana alady. Al memlekettik bilim berý grantyna ıe bola almaǵan jaǵdaıda «Keleshek» baǵdarlamasy boıynsha jalpy oqý qunynyń jartysyn jınaqtaı alǵan talapkerler Sátbaev ýnıversıtetine oqýǵa túsken kezde arnaıy jeńildikterge ıe bolady.
ALMATY