Aralar áleminde tártip qatań. Erejeni buzǵandarǵa aıaýshylyq bolmaıdy. Aýyr jazaǵa tartylady. Eń qyzyǵy, aralar arasynda «maskúnemdik» keshirilmeıtin kúná sanalady. Qalaısha deısiz ǵoı?
Aralar kún uzaq gúlden shyryn jınap, tynymsyz eńbektenedi. Biraq keıde olar ashyǵan bal shyrynǵa tap bolady. Bul – ara úshin naǵyz qasiret. О́ıtkeni ashyp ketken bal shyrynnyń quramynda spırt bar. Al álgi shyryndy baıqaýsyzda ishken ara tepe-teńdigin joǵaltyp, qulap-súrinip, usha almaı qalady. Eger ol uıaǵa deıin aman-esen jetse, eń qorqynyshtysy – sol. Sebebi aranyń mas kúıinde kelýi – keshirilmes qylmys. Uıanyń qaqpasyn kúzetip turǵan qyraǵy saqshylar «iship kelgen» uıalasyn birden tanıdy. Esiktiń aldynda teńselip, baǵytynan jańylǵan mas arany kirgizbek túgili, basqalarǵa sabaq bolsyn dep aıaýsyz jazalaıdy. Kúzetshiler mas aranyń aıaǵyn, qanatyn julyp, uıadan alastaıdy. Bul – olardyń ózgermeıtin zańy. Qanattary bútin bolǵanymen, aıaqsyz qalǵan ara uzaqqa ushyp kete almaıdy. Ol uıadan shettep, jalǵyz qalyp, kóp uzamaı ólim qushady.