Osy jyldyń 7 mamyrynda Astanada Jeńistiń 80 jyldyǵyna arnalǵan áskerı sherý ótedi. Sherýge qatysatyn 4 myńnan astam áskerı qyzmetkerdiń 315-i mýzykanttar, dep jazady Egemen.kz.
QR kúshtik qurylymdarynan turatyn orkestrdiń quramynda ulandyqtar da bar. Olar ózge de áriptesterimen birlesip, Jeńis sherýin mýzykamen súıemeldeıdi.
Ulttyq ulannyń baspasóz qyzmeti quqyqtyq tártip áskeriniń orkestri sherýge qyzý daıyndalyp jatqanyn habarlady. Byltyrǵy jeltoqsanda áskerı sherýge daıyndyq máseleleri talqylanyp, mýzykalyq shyǵarmalar iriktelgen bolatyn. Osy irikteýde QR IIM Ulttyq ulanynyń áskerı dırıjerlary jazǵan 4 mýzykalyq shyǵarma sherýde oryndalýǵa laıyqty dep tańdaldy.
«Sherý kezinde bizdiń orkestr «Shattyq», «General Shakır Djeksenbaev» jáne quqyqtyq tártip áskeriniń ánuranyna aınalǵan «Eldiń qorǵany» men «Batyr» marshtaryn oryndaıdy. Bul shyǵarmalar jaýyngerlerdiń boıyndaǵy rýhty oıatady jáne jigerlendiredi», deıdi Áskerı-orkestr ortalyǵynyń basshysy Oljas Qudaıqulov.
Osy týyndylardyń ishinde «Batyr» qarsy alý marshyn ortalyqtyń aǵa ofıseri Naıl Valıev jazǵan.
«Bir jyl buryn maǵan úrmeli orkestrge arnalǵan marsh jazý ıdeıasy keldi. О́zim de úrmeli aspaptarda oınaımyn, klarnetıstpin. Meniń bul týyndymnyń mýzykasy kúshti, anyq, jyldam jáne jarqyn. Avtor retinde shyǵarmamnyń aýqymdy áskerı sherýde oryndalatyny men úshin úlken abyroı», dedi Naıl Valıev.
Aıta keteıik, Ulttyq ulannyń orkestr músheleri áskerı sherýge oraı kıim úlgilerin de jańartpaq.