Jumysshy mamandyqtary jylynda «Nest Stroy» qurylys kompanııasynyń basshylyǵy qyzmetkerlerine «Naýryz jumysker» baǵytymen nesıe alýǵa bastapqy jarna úshin 1 mln teńge beredi. «Nest Stroy» qurylys kompanııasy Almaty oblysynda jaqynda ǵana jańadan boı kótergen Alataý qalasynda «Gate City» turǵyn úı keshenin salyp jatyr.
Osy oraıda «Nest Stroy» JShS dırektory Aleksandr Nestersov pen «Otbasy bank» basqarma tóraǵasynyń orynbasary Nurlan Aqshanov «Naýryz jumysker» baǵytyn júzege asyrý jáne bank klıentteri qoljetimdi nesıege qol jetkizý úshin árlengen páterlerdi berý boıynsha yntymaqtastyq týraly kelisimderge qol qoıdy. Osy qujattardyń arqasynda qurylys kompanııasynda jyldar boıy adal jumys istep kele jatqan kásibı qyzmetkerlerge «Naýryz jumysker» baǵytyna qatysý úshin bastapqy jarna retinde qaıtarymsyz 1 mln teńge beriledi.
Kompanııa qyzmetkerleriniń «Otbasy banktegi» jınaq shottaryna qarajat aýdarǵannan keıin olar «Otbasy bank» fılıalyna júginip, tólem qabilettiligin rastap, «Naýryz jumyskerge» qatysýǵa ótinish bere alady. Budan bólek, «Nest Stroy» JShS qanatqaqty rejimde «Otbasy bank» salymshylaryna qoljetimdi nesıeleý úshin «Gate City» turǵyn úı kesheninen 20 páter beredi. Árlengen daıyn páterlerdi baspana qunynyń 50%-yn jınaǵan, biraq nesıeleý úshin baǵalaý kórsetkishi az bank klıentteri satyp ala alady. Dese de, basymdylyq birinshi kezekte jumysshy mamandyq ıelerine berilmek.
«Otbasy bankte» aralyq nesıe alý úshin baǵalaý kórsetkishiniń eń tómengi máni 5 bolýy kerek. Oǵan páter qunynyń 50%-y mólsherinde depozıt toltyrǵannan keıin keminde 6 aı ótken soń jetýge bolady. Sonda ǵana bank jyldyq 8,5%-ǵa deıin (JTSM 9%-dan 9,6%-ǵa deıin) mólsherlememen nesıe beredi.
Osylaısha, «Gate City» turǵyn úı kesheninen páter satyp alǵan klıentter baǵalaý kórsetkishi 5-ke jetkenin kútpeı birden daıyn úıge kóship, qonys toıyn toılaı alady. Alty aı boıy páterde turǵan kezde tek kommýnaldyq qyzmetterdiń aqysyn tóleıdi.
«Gate City – Alataý qalasyndaǵy alǵashqy turǵyn úılerdiń biri. Búgin biz kompanııamen eki memorandýmǵa qol qoıdyq. Baspana qunynyń jartysyn jınap, 6 aı ishinde kommýnaldyq tólemderdi ǵana tólep turý degen – jańa bastama. Taza árlengen páterler naryqta óte sırek kezdesedi. Ádette Qazaqstanda qurylys kompanııalary páterdi árleýsiz sata beredi. Al úı jóndeýge, santehnıkaǵa satyp alýshynyń qaltasynan aqsha shyǵady. Sondyqtan «Nest Stroy» basqalarǵa úlgi bolyp otyr. Sondaı-aq kompanııa óz qyzmetkerlerine «Naýryz jumysker» baǵytyna qatysý úshin bastapqy jarna retinde qaıtarymsyz 1 mln teńge beredi. Mysaly, úı quny 30 mln teńge bolsa, bastapqy jarnanyń úshten birin kompanııa tóleıdi. Bul bastama jumysshylardy yntalandyratyny sózsiz», dedi «Otbasy bank» basqarma tóraǵasynyń orynbasary Nurlan Aqshanov.
«Gate City» turǵyn úı kesheninde úıler 9 qabatty, taza árlengen páterler. Aýlasy abattandyrylǵan, balalar alańy jáne work out alańy bar. Aýlaǵa kólik kirmeıdi, bul balalardyń qaýipsizdigi úshin qolaıly bolmaq. Páterdiń bir sharshy metri 395 myń teńgeden satylady. Páter quny 18 mln teńgeden bastalady.
«Páterler, aýla unady. Aýlada serýendeýge, balalar oınaýǵa, jattyǵý jasaýǵa jaǵdaı jasalǵan. Apattan saqtaný úshin kólik kirmegeni jón. Qazir adamdar osyndaı qaýipsiz úılerde turǵysy keledi. Almatyǵa avtobýs qatynaıdy. Mektep pen balabaqsha salynyp jatyr. Munyń bári qarapaıym dúnıe bolyp kóringenimen, bul adamdardyń jaıly ortada ómir súrýine jaǵdaı jasaıdy. Úılerdiń túrli túske boıalýy da jaılylyqtyń belgisi», dedi Nurlan Aqshanov.
Aıtýynsha, «Naýryz», «Naýryz jumysker» baǵytynyń qatysýshylary taza árlengen úıdi alǵan jaǵdaıda bastapqy jarna somasy 20%-dan 10%-ǵa túsedi. Osylaısha, «Otbasy bank» seriktes qurylys kompanııalarǵa da páterlerdi taza árlengen daıyn kúıde paıdalanýǵa berýdi usynyp otyr.
«Biz «Otbasy bankpen» burynnan seriktespiz. Búgin kompanııalar arasynda ózara strategııalyq memorandýmǵa qol qoıdyq. «Naýryz jumysker» aıasynda qyzmetkerlerimiz de baspanaly bolsyn dep olarǵa bastapqy jarna úshin qaıtarymsyz 1 mln teńge beremiz. Almatyda jer jetpeıdi, úı salý qıyndap barady. Sol úshin Alataý qalasynda aýlasy keń, sapaly turǵyn úı salǵymyz keldi. Mektep, balabaqsha, ártúrli nysandar boı kóterip, qala kórkeıedi dep senemiz», dedi «Nest Stroy» JShS dırektory Aleksandr Nestersov.
«Otbasy banktiń» Almaty oblystyq fılıalynyń dırektory Qýanysh Ulasbekov «Nest Stroy» men bank arasyndaǵy qoljetimdi nesıeleý jobasyna kez kelgen adam qatysa alatynyn, qanatqaqty joba sátti iske assa páter sany da kóbeıetinin atap ótti. «Otbasy bank» basshylyǵy osy jobaǵa basqa da qurylys kompanııalary qosylady dep úmittenedi. «Otbasy bank» bul tetikti «satyp alý quqyǵymen jalǵa berý» dep atady. Ol «Korporatıvtik» ónim aıasynda júzege asyrylady. «Gate City» turǵyn úı kesheninde nesıege beriletin páterlerdiń eń joǵarǵy quny 36,8 mln teńgeni quraıdy.
2025 jylǵy 14 sáýirden bastap «Otbasy banktiń» Almaty oblystyq fılıalynda ótinish berýge bolady. Páterlerdi úlestirý kezinde jumysshy mamandarǵa basymdyq beriledi.