Qarjy mınıstrliginiń habarlaýynsha, 2025 jylǵy 1 qańtardan bastap kúshine engen «Memlekettik satyp alý týraly» jańa zań otandyq óndirýshiler men shaǵyn jáne orta bıznesti qoldaýǵa baǵyttalǵan. Bul zań kásipkerlerge memlekettik tapsyrys arqyly turaqty tabys kózine ıe bolýǵa jáne óz ónimderine kepildi suranys qalyptastyrýǵa múmkindik beredi, dep habarlaıdy Egemen.kz.
Mınıstrlik ókilderiniń aıtýynsha, zańnyń birinshi jańashyldyqtar blogy satyp alý rásimderin ońaılatý men qysqartýǵa arnalǵan. Bul satyp alýdy jedel júrgizýge, tapsyrys berýshilerdiń ókilettigin keńeıtýge jáne rásimderdi uzartýǵa jol bermeýge baǵyttalǵan.
Jańa zańǵa sáıkes, jetkizýshi týraly aqparat memlekettik organdardyń aqparattyq júıeleri arqyly qalyptastyrylady. Shaǵymdardy satyp alýdy uıymdastyrýshy tikeleı qaraıdy. Al satyp alý qorytyndysyn daýlaý tek veb-portal arqyly jáne konkýrs komıssııasy jeńimpazdy anyqtaǵan satyp alýlar boıynsha ǵana múmkin bolady.
Sonymen qatar, zańda sybaılas jemqorlyq quqyqbuzýshylyqtary úshin jaýapty bolǵan kompanııalar, olardyń basshylary nemese quryltaıshylary memlekettik satyp alýǵa qatysý quqyǵynan aıyrylady. Bul norma sybaılas jemqorlyq táýekelderin barynsha azaıtýǵa baǵyttalǵan.
Sondaı-aq zań boıynsha memlekettik satyp alýlar men kvazımemlekettik sektor sýbektileriniń satyp alýlaryna biryńǵaı qoljetimdilikti qamtamasyz etetin, «Elektrondyq qarjy ortalyǵy» AQ bazasynda qurylǵan biryńǵaı elektrondyq platforma engizildi.
Qarjy mınıstrligi jańa zańnyń memlekettik satyp alýlardyń ashyqtyǵy men tıimdiligin arttyryp qana qoımaı, satyp alynatyn taýarlar men qyzmetterdiń sapasyn kóterýge, qatysýshylardyń jaýapkershiligin kúsheıtýge jáne otandyq óndirýshilerdi qoldaýǵa múmkindik beretinin atap ótti.