О́skemende Ulttyq quryltaı sheshimderin júzege asyrý aıasynda «Shekaralyq aýmaqtardy damytý – óńir damýynyń negizi» taqyrybynda saraptamalyq keńestiń otyrysy ótti. Jıynǵa oblystyq basqarmalar, qoǵamdyq uıymdar, ǵylymı qaýymdastyq pen BAQ ókilderi qatysty. Onlaın rejımde Zaısan aýdany ákimdigi qosyldy, dep habarlaıdy Egemen.kz.
Jıyndy Shyǵys Qazaqstan oblystyq máslıhatynyń tóraǵasy Denıs Rypakov júrgizdi. Ol Abaı jáne Shyǵys Qazaqstan oblystaryndaǵy shekaralyq aýdandar mártebesiniń qalpyna keltirilýi naqty nátıjeler berip jatqanyn atap ótti: óńirlerde áleýmettik jáne ekonomıkalyq ómir jandanyp, ınfraqurylym jaqsaryp keledi.
Memleket basshysy Qasym-Jomart Toqaev shekara mańyndaǵy aýmaqtardyń strategııalyq mańyzyna toqtalyp, olardyń mártebesin qalpyna keltirý Abaı men ShQO-da júzege asyrylǵanyn eske salǵan.
Mańyzdy qadamdardyń biri – Tarbaǵataı, Úlken Naryn jáne Marqakól syndy buryn taratylǵan shekaralyq aýdandardyń mártebesin qaıta qalpyna keltirý boldy. Bul aýmaqtardyń damýyna, jergilikti halyqtyń ómir súrý sapasyn arttyrýǵa jáne ulttyq qaýipsizdikti nyǵaıtýǵa yqpal etti. Basym baǵyttardyń biri – qonys aýdarýshylardy qoldaý jáne aýyldyq jerlerge mamandar tartý jobalary: erikti qonys aýdarý baǵdarlamasy men «Dıplommen – aýylǵa!» jobasy.
Kezdesýde kólik-logıstıkalyq ınfraqurylymdy jańǵyrtýǵa erekshe nazar aýdaryldy. Solardyń biri – Buqtyrma sý qoımasy arqyly kópir salý jobasy sátti júzege asyrylyp, óńirdiń kólik baılanysyn edáýir jaqsartty. Sonymen qatar, Zaısan jáne Katonqaraǵaı aýdandarynda eki jańa áýejaıdyń qurylysy júrip jatyr.
Qatysýshylar óńirlik damý teńgerimsizdigin azaıtý qajettigin de atap ótti. Qazirgi tańda ınfraqurylymdyq jáne áleýmettik teńsizdikterdi joıýǵa, memlekettik organdar arasyndaǵy ózara is-qımyldy kúsheıtýge baǵyttalǵan jańa О́ńirlik damý tujyrymdamasy ázirlenip jatyr.
Talqylaýǵa áleýmettanýshy, ǵylym kandıdaty Eleonora Stolıarova, Ulttyq quryltaı múshesi Olga Kýzovleva, oblystyq áıelder isteri jáne otbasylyq-demografııalyq saıasat jónindegi komıssııa múshesi Zarına Kamasova, sondaı-aq ekonomıka, bilim berý, jer qatynastary, kásipkerlik, týrızm basqarmalarynyń ókilderi, Zaısan aýdanynyń ákimi men ǵalymdar qatysty. Is-sharada shekaralyq aımaqtardy odan ári damytýǵa baǵyttalǵan usynystar men pikirler aıtylyp, jıyn qorytyndylandy.
Shyǵys Qazaqstan oblysy