Petropavlda bıýdjet qarjysyn jalǵan kelisimsharttar arqyly jymqyrǵan Soltústik Qazaqstan oblystyq máslıhat depýtaty Pavel Býlaevqa jáne onyń úsh sybaılasyna qatysty sot úkimi shyqty, dep habarlaıdy Egemen.kz.
2024 jyldyń naýryzynda Sybaılas jemqorlyqqa qarsy qyzmet Pavel Býlaev pen onyń úsh sybaılasyn ustady. Tergeý málimetterine sáıkes, ol «Petropavl qalasy ákimdiginiń sarqyndy sýlardy tazartý, sý burý jáne sý burý qurylystary» MKQK dırektorynyń mindetin atqarýshy retinde kásiporyn atynan kommersııalyq uıym quryp, 2019-2021 jyldar aralyǵynda zań talaptaryna qaıshy, senimgerlikpen kásipkerlik tapsyrys arqyly zańsyz qyzmetti júzege asyrǵan.
2020-2022 jyldary depýtat pen onyń seriktesteri kommýnaldyq kásiporyndarmen jasalǵan jalǵan kelisimsharttar arqyly bıýdjetten 258 mıllıon teńgege jýyq qarajatty urlaǵan.
Aıyptaý aktisinde kórsetilgendeı, Pavel Býlaev memlekettik qyzmetker retinde zańsyz kásipkerlikpen aınalysyp, bıýdjet qarajatyn asa iri kólemde ıemdenip, qylmystyq jolmen alynǵan aqshany jylystatqan. Ol jáne basqa sottalýshylar qyzmettik jaǵdaıdy paıdalanyp, ózderine tıesili emes jumys pen tehnıkany jalǵan kelisimshart arqyly rásimdegen.
Sot barysynda anyqtalǵandaı, Býlaevtyń burynǵy áıeli men onyń jaqyn týystarynyń atyna Petropavl qalasynda alty páter, sondaı-aq dúken, garaj, jer ýchaskeleri, sheberhana men birneshe avtokólik — Toyota Land Cruiser, BMW X6, Porsche Macan tárkilendi. Sonymen qatar, arnaıy tehnıka da memleket menshiginen alyndy.
Sot úkimine sáıkes, Býlaev segiz jylǵa bas bostandyǵynan aıyrylyp, memlekettik qyzmette ómir boıy qyzmet atqarý quqyǵynan aıyryldy. Qalǵan úsh sottalýshy 7,5 jylǵa sottaldy. Barlyq sottalýshylar sot zalynda qamaýǵa alyndy.
Prokýror Zalına Lınkevıch sotta aıyptalýshylardyń kinási tolyq dáleldengenin atap ótti. Kommýnaldyq kásiporyn qyzmetkerleriniń bergen kýálikteri boıynsha, barlyq jumystar óz kúshterimen oryndalǵany anyqtaldy. Bul faktiler jalǵan kelisimsharttar arqyly bıýdjet qarajatyn jymqyrǵan shemany rastaıdy.
Petropavl qalalyq soty úkiminde sottalýshylardan memleketke keltirilgen 805 mıllıon 651 myń 700 teńge mólsherindegi zalal óndiriletini de aıtyldy.
Sottyń aıtýynsha, Býlaev memlekettik qyzmetker retinde óz bedelin paıdalanyp, úlken kólemde sybaılas jemqorlyq jasaǵan. Bul is oblystaǵy jemqorlyqqa qarsy kúrestiń mańyzdy mysaly.
Janel TО́LEÝBEKOVA, EUÝ stýdenti