Kásibı biliktilik jáne zamanaýı tehnologııa

Jańadan ashylǵan ońaltý kesheninde sapaly qyzmet kórsetýge barlyq jaǵdaı jasalǵan Keshe Elbasy Nursultan Nazar­baev Prezıdenttiń Is basqarmasy Medısınalyq ortalyǵynyń klı­nıkalyq ońaltý kesheniniń ashylý rásimine qatysty. Memleket basshysy kópsalaly jańa keshendi aralap kórip, ondaǵy ujym múshelerimen áńgimelesti. О́z sózinde Nursultan Nazar­baev tıisti kásibı personaly, joǵary sapaly qural-jab­dyq­tary, qajetti seksııalary túgel qamtylǵan medısınalyq mekeme barlyq zamanaýı talaptarǵa saı ekenin atap ótti. Sondaı-aq, Qazaqstan Prezıdenti densaýlyq saqtaý salasynyń odan ári damýy mańyzdy ekenine, bul el turǵyndarynyń densaýlyq sapasyna oń áserin tıgizetinine toqtaldy. «Qazaqstandyqtar em alý úshin shetelderge barady. Osyndaı keshenderdiń paıda bolýymen medısınalyq týrıster legi bizdiń elge baǵyt alatyn bo­lady. Munda tolyqqandy ju­mysqa qajetti jaǵdaıdyń bári jasal­ǵan, endi sizderge óz min­det­terińiz­di sapaly oryndap, halyq densaý­lyǵyn jaqsartý kerek», – dedi Mem­leket basshysy keshen ma­man­darymen áńgimelesý ke­zinde. Al mekeme qyzmetkerleri óz kezeginde Nursultan Nazarbaevqa densaýlyq saqtaý salasyn damytý máselelerine nazar aýdaryp otyrǵany úshin alǵys aıtyp, osyndaı biregeı keshende jumys isteý zor qurmet ekenin ári úlken jaýapkershilik júkteıtinin atap ótti. Olar halyqqa sapaly medısınalyq kómek kórsetýge daıyn ekendikterine Elbasyn sendirdi. Erekshe kóńil-kúıge bólengen aq jeleńdiler Memleket basshysyna degen alǵystaryn ózgeshe jetkizip, «О́mir, men seni jaqsy kóremin!» degen ándi oryndap berdi. Klınıkalyq ońaltý kesheninde emde­lýshilerge medısınalyq kómek kórsetýdiń barlyq satysy qarastyrylǵan eken. Mun­daǵy emdeý bólimsheleri sheteldiń ozyq medısınalyq tehnıkalarymen jabdyq­talǵan. 13 ǵımaratty qamtıtyn, bir aýysymda 1000 adam qabyldaıtyn 4 emhanasy, 35 qurylymdyq bólimshesi, sondaı-aq, 200 oryndyq stasıonary bar keshenniń jalpy aýmaǵy 84 myń sharshy metrdi alyp ja­tyr. Keshen quramyna biregeı dıag­nos­tıkalyq blok jáne ıadrolyq medısına bó­limshesi kiredi. Ǵımarat pen onyń ınfra­qurylymynyń jumysyn qamtamasyz ete­tin negizgi júıelerdiń monı­to­rıngi men basqarylýy avto­mat­tandyrylǵan. Sondaı-aq, bul ortalyq jańa zamannyń ınnovasııalyq jetistikterine sáıkes resýrs únemdeýshi tehnologııalarmen qamtamasyz etilgen. Atalǵan mekemede joǵary bilikti mamandar, sonyń ishinde medısına ǵylymdarynyń 11 doktory men 24 kandıdaty jumys isteıtin kórinedi. Dárigerlerdiń jar­tysynan astamy joǵary sanatqa ıe. Árıne, emdeýdiń joǵary deńgeıdegi standarty ár­daıym kásibı biliktilikti je­tildirip otyrýdy talap etetini belgili. Sol sebepti, mekeme qyzmetkerleri alys jáne jaqyn shetelderdiń je­tekshi klı­nıkalaryndaǵy maman­darmen tájirıbe almasyp qaıt­qan eken. Máselen, atalǵan klı­nıkalyq ońaltý kesheni bas­shysynyń birinshi orynbasary, medısına ǵylymdarynyń doktory Sáýle Dúısebekqyzy eńbek ujymynyń osyndaı zamanaýı ǵımaratta jumys isteýge tolyqtaı ázir ekendigin aıta kele, mamandardyń saqadaı-saı qyzmet kórsetý deńgeıine jetýge birshama ýaqyt ketkendigin jetkizdi. «Bizdiń daıyndyǵymyz bir­neshe jyl buryn bastalǵan edi. Eń úlken jetistigimiz – ol bizdiń tájirıbeli mamandarymyz. Mamandarymyzdy 2-3 jyl boıy Qazaqstanda jáne Izraıl, Koreıa, Germanııa, Belgııa sekildi shetelderde tájirıbeden ótkizdik. Tek 2014 jyly ǵana 37 maman shetelderde bolyp, kásibı bi­liktilikterin arttyryp qaıtty. Bul – óte jaqsy kórsetkish. Sondyqtan, bizde dáriger-ma­mandardyń sany jetkilikti deýimizge tolyqtaı negiz bar. Endigi kezekte bizdiń aldymyzda turǵan basty maqsat – ol halyqqa joǵary sapaly medısınalyq qyzmet kórsetý. Klınıkalyq ońaltý kesheninde emhanalyq bólimder bar. Olarǵa kúnine 1200-ge jýyq adam kele alady. Stasıonarlyq bólimsheler de emdelýshilerdi qabyldaýǵa, olarǵa járdem kórsetýge daıyn tur. Iаǵnı, bul keshennen tek memlekettik qyzmetkerlerdiń ǵana emes, Qazaqstan halqynyń kez kelgen em túrlerin alýyna tolyqtaı múmkindigi bar. Má­se­len, ıadrolyq medısına, sáýle­men emdeý bólimshelerindegi me­dısınalyq qyzmetterdiń sapasy óte joǵary», dedi S.Dúıse­bekqyzy. Al osy keshendegi taǵy bir bilikti maman Talapbek Ájenov 1-shi hırýrgııalyq bólimsheniń meńgerýshisi eken. Bul bó­limshege júktelgen mindet – qulaq, muryn, tamaq aýrýlaryn emdeý. «Bizdiń bólimshe sońǵy úlgidegi medısınalyq tehnıkalarmen jabdyqtalǵan. Munda kvota negizinde naýqastarǵa joǵary medısınalyq qyzmetter tegin kórsetiledi. Máselen, biz óte sozylmaly muryn aýrýlary asqynýlarynyń aldyn alamyz. Sondaı-aq, kómeı aýrýlaryn lazermen emdeý de osy bólimshede júzege asyrylady. Bizge kelip túsken naýqastardyń jaǵdaıyn jaqsartý aıryqsha nazarda tur. Mundaǵy palatalar 1-2 oryndyq. Bul emdelýshilerdiń jaǵdaıyn túzeýge áser etip qana qoımaı, olardyń ózge aýrý túrlerin juqtyrý qaýpin azaıtady. Bizdiń negizgi maqsatymyz – halyqqa joǵary medısınalyq qyzmet kórsetip, olardyń jaǵdaıyn jaqsartý. Aldaǵy ýa­qytta ózimizge júktelgen mindetterdi abyroımen atqa­ramyz dep oılaımyn», dedi maman. Láıla EDILQYZY, «Egemen Qazaqstan». Sýretterdi túsirgender S.BONDARENKO, B.OTARBAEV.